Qaıyrymdylyq qanatynda

Taıaýda Astana qalasyndaǵy «Ana men bala» ulttyq ǵylymı orta­lyǵynda «Qazaqstan halqy Assambleıasy Qory» qoǵamdyq qory Qazaqstan Respýblıkasy Táýel­siz­diginiń 25 jyldyǵy aıasynda, leıkoz, onkologııa jáne ózge de aýyr syrqat túrlerine shaldyqqan balalardy qoldaý maqsatynda «Meıirimdilik arqyly birlikke» atty qaıyrymdylyq aksııasyn ótkizdi. Qazaqstandaǵy balalar qu­qy­ǵy boıynsha ýákil, Par­la­ment Májilisiniń depýtaty Zaǵıpa Balıeva bala­syn jetektegen árbir ananyń qabaǵyna qarap halin, júzine qarap janyn túsine bilgeni, ózgeler sekil­di shen-shekpenine qaramaı, on­daǵy emdelýshilermen emen-jar­qyn sóılesip, jaǵdaı sura­ǵa­ny qaıran qaldyrǵandaı. Tipti, keıbirine qýyrshaq syılap, perishte kóńildi sábılerdi qýantyp-aq tastady. Odan keıin sóz alǵan Par­lament Májilisiniń depýta­ty Iýrıı Tımoshenko, son­daı-aq, «Ana men bala» ult­tyq ǵy­ly­mı ortalyǵynyń» dári­ger­­ler qaýymy syrqat bala­syn arqalaǵan analardy shy­dam­dylyqqa shaqyryp, emdelý­shilerge shıpa tiledi. Aksııa barysynda Ortalyqqa qajetti dári-dármek  tabystalyp, balalarǵa syı-sııapat tartý etildi jáne  Astana qalasynyń etnomádenı birlestikteri shyǵar­ma­shylyq ujymdary men talant­ty jas­tarynyń konserti ótti. Atalǵan sharaǵa «Qazaqstan ýkraındarynyń radasy» zań­dy tulǵalar respýblıkalyq birle­stigi,  QHA músheleri, «Asyl bala» respýblıkalyq qaýym­dastyǵy, «Altyn Kyran» halyqaralyq qaıyrymdylyq qory» korporatıvtik qory, «KMF» shaǵyn qarjy uıymy, «Janna Áýbákirovanyń art-stý­dııasy» shyǵarmashylyq ujy­my men Astana qalasy etno­mádenı birlestikteriniń ókilderi qatysty. Bes jyl ishinde Qazaqstan halqy Assambleıasynyń Qory «Ana men bala ǵylymı orta­lyǵy» AQ-qa qoldaý tanytýda. Qor arqyly 500-den astam balaǵa járdem jasalyp, sheteldik joǵary bilikti mamandardyń dıagnostıka jasaýy qamtamasyz etildi. Jalpy alǵanda, seriktestermen jáne demeýshilermen birlese otyryp, 59 mln. teńgeden astam somaǵa kómek kórsetildi. Raýshan TÁÝIRHANQYZY, «Egemen Qazaqstan»