ASTANA. 19 sáýir. Qazaqstan Respýblıkasy men AQSh qorǵanys vedomstvolary arasynda ekijaqty yntymaqtastyq sheńberinde elimizdiń Qarýly Kúshteri Áskerı teńiz kúshteriniń bas qolbasshysy kontr-admıral Jandarbek Janzaqov teńiz ınfraqurylymynyń qaýipsizdigi jónindegi halyqaralyq sımpozıýmǵa qatysty. Bul týraly egemen.kz tilshisi habarlady.
Búgingi tańda teńiz ınfraqurylymy óte kókeıkesti másele. Álemniń kóptegen elderi lańkesterdiń, qaraqshylardyń tarapynan qaýip-qaterlerge dýshar bolyp otyr. Osy qaterdi boldyrmaý jáne saýda kemeleriniń teńizde júzý qaýipsizdigin qamtamasyz etý úshin teńiz kompanııalaryna Áskerı-teńiz kúshteri jáne jaǵalyq kúzetpen tyǵyz qarym-qatynasta bolý qajet. Konferensııa barysynda 30 eldiń Áskerı-teńiz kúshteriniń ókilderi, 20-dan asa kompanııa jáne áskerı-teńiz salasyndaǵy 30-dan asa maman osy jáne ózge de máselelerdi talqylady.
Odan basqa, sapar barysynda QR QK ÁTK bas qolbasshysy besinshi flottyń qolbasshysy vıse-admıral K. Doneganmen kezdesti. Kezdesýde QR QK ÁTK áskerı qyzmetshileriniń AQSh ÁTK 5-shi flotynyń korablderinde praktıkadan jáne taǵylymdaman sátti ótýi, sondaı-aq olardyń ártúrli konferensııalarǵa, forýmdar men sımpozıýmdarǵa qatysýy talqylandy. Sonymen qatar eki eldiń áskerı qyzmetshileri AQSh ÁTK-niń «Proud Lions» korabline bardy.
Búgingi tańda shetelde elimizdiń Áskerı-teńiz kúshteriniń bolashaq áskerı qyzmetshileri atanatyn 50-den asa qazaqstandyq kýrsant bilim alyp jatyr.
Dastan Kenjalın.
Derek, foto: Qorǵanys mınıstrligi.
