Keshe, 21 sáýir kúni Grekııanyń Olımp taýy etegindegi ejelgi Gera hramynyń ashyq alańynda XXXI jazǵy Olımpııalyq oıyndardyń alaýy tutatyldy. Osyǵan arnalǵan saltanatty sharada grek aktrısasy Katerına Lehoý joǵarǵy abyz áıeldiń rólin atqaryp, baǵzy úrdispen kún sáýlesiniń qyzýy arqyly sımvoldyq máni bar qutyǵa ot júgirtti.
Budan keıin alaýdy alyp júgirýge arnalǵan dástúrli estafeta jolǵa tústi. Ony grektiń 25 jastaǵy gımnasty Elefterıos Petrýnıas bastady. Ellada jerinde alty kún sharlaıtyn alaýdy grek sportshylary alyp júredi. Olardyń arasynda bosqyndar sapyndaǵy bir sportshy bolatyny da aıtylyp jatyr.
Estafeta alaýy 27 sáýir kúni Afına qalasynda Rıo-2016 Olımpıadasy uıymdastyrý komıtetiniń delegasııasyna saltanatty túrde tabys etiledi. Osydan bastap Olımpııalyq alaý óziniń 100 kúndik saparyna jol ashady. Ol Brazılııa terrıtorııasyna 3 mamyrda taban tireıdi. Budan ári eldiń aýmaǵyn uzaq ýaqyt aralap kelip, barlyq shtattardaǵy 500 eldi mekendi basyp ótedi. Tyǵyrshyqtaǵy ot 5 tamyz kúni ǵana saparyn aıaqtap, Rıo-de-Janeırodaǵy «Marakana» stadıonyna Oıyndardyń saltanatty jaǵdaıda ashylý rásimi kezinde jetkiziledi.
Ońtústik Amerıkanyń osy elinde jalaý kóteretin Olımpııalyq oıyndar 5-21 tamyz aralyǵynda jarys kórigin qyzdyrady.
Olımpııalyq alaýdy alyp júgirý dástúri budan 80 jyl buryn, 1936 jyly Berlınde ótken Olımpııalyq oıyndardyń qarsańynda birinshi ret qolǵa alynǵan bolatyn.
«Egemen-aqparat»
