Beıbitshilik qusynyń uıasy

Ulttyq mýzeıde Vengrııadaǵy halyqaralyq Holokost qurbandaryn eske alý kúnine oraı «HH ǵasyrdyń umytylmaǵan taǵdyrlary» atty shara ótti. Ulttyq mýzeı dırektorynyń orynbasary Jazıra Kúlbaeva kópshilik bile bermeıtin bul kúnniń erekshelikterine toqtala kelip, halyqtardyń bir-biriniń mádenıeti men tarıhyn etene tanyp-bilýi úshin, álemdegi beıbitshilik pen tatýlyqqa qu­rylǵan mundaı sharalardyń aı­tarlyqtaı ról atqaratyndyǵyn aıtty. – 31 mamyr elimizdegi saıası qýǵyn-súrgin qurbandaryn eske alý kúni bolyp sanalady. Al Vengrııa memleketinde, sol sııaqty, sáýirdiń 16-sy kúni Ho­lokost qurbandaryn eske alý dástúrge aınalǵan. Árıne, onyń bári de orny tolmas qasiretter. Qalaı desek te beıbit zamanǵa eshteńe jetpeıdi. Álemde ult arazdyǵy, qantógis bolmasyn. Adamzat tynyshtyq pen ózara kelisimde ómir súrse eken deımiz. Sebebi, bul barlyǵymyzdyń baǵa jetpes asyl qundylyǵymyz bolyp tabylady, – dedi J.Kúlbaeva. Jıynǵa qatysyp sóz sóılegen Vengrııanyń Qazaqstandaǵy  el­shisi Andrash Baranı jazyqsyz aıdaýǵa túsken evreı ultynyń Holokost qalasyndaǵy qazirgi ómiri týraly áńgimeleı kele, tarıhı qurbandardy eske alý sharasyn ótkizýge jaǵdaı jasaǵan Ulttyq mýzeıge alǵysyn jetkizdi. – Qazirgi ýaqytta Vengrııadaǵy evreı ulty beıbit tirlik keship jatyr. Olardyń jaıly ómir súrýi úshin memleket tarapynan barlyq jaǵdaılar jasalǵan. Biz Ekinshi  dúnıejúzilik so­ǵys jyldary evreılerdiń  kó­zin jappaı joımaq bolǵan   na­sısterdiń qylmystaryn aıyptaımyz ári jazyqsyz qýdalaýǵa ushyraǵandardy máńgi jadymyzda saqtaımyz. Búgingi is-sharany ótkizýge múmkindik tý­ǵyzǵandaryńyz úshin Ulttyq mýzeı basshylyǵyna rahmet aıtamyz, – dedi A.Baranı. Reseı evreı kongresi mýzeıi qorynyń bas qor saqtaýshysy Natalıa Anısına eshkimdi beıjaı qaldyrmaıtyn kórme týraly oıyn ortaǵa sala kele, Holokost oqıǵasynyń saldaryna toqtaldy. – Buǵan deıin atalmysh kórme Máskeýde, Ekaterınbýrgte, Kalı­nıngradta ótti. Álbette, mundaı qorqynyshty jyldar artta qalsa da ol bizdiń jadymyzda. Talaı jazyqsyz jannyń qany tógildi. Onyń ishinde balalar da, qarttar da bar. Olardyń urpaqtarynyń taǵdyry ne boldy? Bul – óte aýyr suraq. Álemde beıbitshilik saltanat qursyn. Soǵys, búlik bolmasyn, – dedi N.Anısına. Eske sala keteıik, kórmege 30-40-jyldarǵy oqıǵalarǵa oraı taǵdyrlary kúrt óz­ge­ris­ke ushyraǵan vengrlik ǵalym­dardyń, jazýshylardyń, ak­ter­lerdiń, sportshylardyń, mý­zykanttardyń ómirbaıanynan habar beretin sýretter qoıyldy. Qarshyǵa KÚLEN