Tatıananyń qyrdaǵy áni

Besqaraǵaılyq Galına Baıýn Abaı ánderin tamyljyta oryndaıdy Galına Baıýn – ǵajap ánshi. Shyǵys óńiriniń jurtshylyǵy, ásirese, besqaraǵaılyqtar onyń jan-tánimen oryndaıtyn názik te syrly ánderin súıip tyńdaıdy. Galına Dmıtrıevna 1963 jyldan beri, jarty ǵasyr boıy sahnada sandýǵashtaı saırap, áýezdi ánimen tyńdarmanyn baýrap keledi. Áldeqashan zeınet demalysyna shyqsa da qoǵamdyq ómirden qol úzgen emes. Ol – aýdandaǵy slavıan etnomádenı ortalyǵy jetekshileriniń biri, «Asyl ájeler» vokaldy ansambliniń hám ardagerler horynyń beldi múshesi. Vokaldy toptyń quramynda Reseıdiń Altaı aımaǵyndaǵy Mıhaılovskıı aýdanynda ótetin «Venok drýjby» festıvalinde, oblys ortalyǵynda ótetin aýdan kúnderinde jıi óner kórsetedi. Al Lıýdmıla Shahvorostova jetekshilik etetin slavıan etnomádenı birlestiginiń «Jemchýjınka» folklorly ansambline múshe bolǵanyna 20 jyldan astam ýaqyt ótipti. Qazaq jáne orys tilderinde irkilmeı án salatyn Galınanyń alǵashqy hor dırıjeri Mıhaıl Shahvorostov bolatyn. Mıhaıl Fedorovıch keıin Reseıdiń Altaı aımaǵynda ózi qurǵan «Sıbırıanochka» horymen áıgili boldy. Galına Dmıtrıevna 1956 jyly Besqaraǵaı aýdanyndaǵy Bolshaıa Vladımırovka orta mektebin bitirgennen keıin Almaty qalasyndaǵy respýblıkalyq medısına ýchılıshesine oqýǵa tústi. 1958 jyly oqýdy támamdap, «akýsher» mamandyǵyn alǵan jas qyz joldamamen týǵan aýdanyna keldi. Sodan bergi 40 jyldan astam ýaqyt boıy densaýlyq salasyndaǵy qyzmetin abyroımen atqardy. Alǵashqyda Semıarsk, Boras aýyldyq aýrýhana bólimshelerinde eńbek etti. 1986 jyly uzaq jylǵy eńbeginiń óteýi retinde aýdandaǵy medısına qyzmetkerleriniń qurmet kitabyna enip, birqatar medaldarmen marapattaldy. Mamandyǵy medısına qyzmetkeri bolsa da árqashan sahnaǵa ázirlenýge ýaqyt tabatyn. Galına ájeıdiń repertýarynda túrli halyqtardyń ánderi bar. Ásirese, Abaı ánderin naqyshyna keltirip oryndaıdy. Uly aqynnyń 150 jyldyq mereıtoıynda Abaıdyń «Aıttym, sálem, qalamqas» ánin oryndaǵany shyǵysqazaqstandyqtardyń ǵana emes, dúbirli toıǵa kýá bolǵan alys-jaqynnan kelgen kóptegen qonaqtardyń jadynda. Abaı ánderinen bólek, qazaqtyń halyq ánderi men orys, ýkraın romans­taryn oryndaǵandy jany súıedi. Máselen, «Álııa», «Snegopad», «Eho lıýbvı», «Ýtro týmannoe» ánderi Galıa ájeıdiń oryndaýynda erekshe túrlenip sala beretini bar. Esenınniń sózine jazylǵan «Otgovorıla rosha zolotaıa» ánin besqaraǵaılyqtar aýdanda ótip jatatyn dástúrli romanstar keshinde qaıta-qaıta suratyp oryndatsa, orystyń halyq áni «Sosenkany» О́skemen jurtshylyǵy osy kisiniń oryndaýynda tyńdaǵandy jaqsy kóredi. Galına Dmıtrıevna tek án salyp qana qoımaı, jyr jazady. Qolónerimen de aınalysady. «Sheberdiń qoly ortaq» degendeı, ájeniń jasaǵan buıymdary jurt nazaryna jıi usynylyp jatady. Kórmelerde at-túıedeı qalap alyp ketetinder de barshylyq. Aıtalyq, Shyǵys óńirinde ótken Qazaqstan halqy Assambleıasynyń Dostyq kerýenine bir kisideı atsalysqan Galıa áje Besqaraǵaı aýdanynyń atynan  óziniń qolóner kórmesin usynǵan-dy. Keste tigýdi alǵashqy muǵalimi Elızaveta Revına-Varenıkten, keıin kórshisi Anna Nıkolaevnadan úırengenin aıtady. Qazirgi kezde ózi de keıingi jastardy qolónerge baýlyp júr. 1939 jyly 22 qańtarda Boras aýylynda dúnıege kelgen Galına Dmıtrıevnanyń balalyq shaǵy soǵystyń aýyr jyldaryna tuspa-tus keldi. Maıdanǵa attanǵan ákesi habar-osharsyz ketkendikten, shıetteı balalardy baǵyp-qaǵýdyń bar aýyrtpalyǵy jalǵyz sheshesiniń moınyna tústi. Jýyrda bir týysqany ınternetten Memorıaldaǵy Reseı Federasııasy Qorǵanys mınıstrliginiń ortalyq muraǵatynan kezdeısoq aqparatty kórip, Galına Dmıtrıevnaǵa jiberedi. Osydan keıin ol Besqaraǵaı aýdandyq áskerı komıssarıaty arqyly atalǵan muraǵatqa ótinish joldaǵan eken. Jalǵyz qyzy Galına Baıýn-Kolbına ákesi Dmıtrıı Kolbınniń qaı jerde jerlengenin bilgisi keledi. Dmıtrıı Stepanovıch Belarýste tutqynǵa túsip, 1941 jyly 17 qarashada qaıtys bolǵan eken. Tipti, Germanııa jerinde jerlengen kúnniń ózinde sonda turatyn balasy Sergeı arqyly ákesiniń jerlengen zıratyn taýyp alýyna múmkindik bar edi. Atalǵan aqparat kózinen Galıa ájeı ákesiniń týǵan aǵasy Tıhonnyń Jeńiske sanaýly kún qalǵanda Berlın operasııasy kezinde oqqa ushqanyn biledi. Búginde Galına Dmıtrıevna – segiz nemeresin ásem ánimen terbetip uıyqtatyn baqytty áje. Taıaýda Besqaraǵaı aýdandyq mádenıet úıinde ótkizgen shyǵarmashylyq keshine ánshi ájeniń barlyq bala-shaǵasy qatysty. Tipti, Germanııadaǵy balasy Sergeı men nemeresi, Semeıdegi ápke-sińlileri de qonaq bolyp, ónerli ájelerin maqtan tutatyndaryn aıtty. Sol keshte aýdan ákiminiń alǵys hatymen marapattalyp, qazaqtyń aq jaýlyǵyn syıǵa alýy, aýdandyq medısına qyzmetkerleri men túrli mekemelerden, onyń ishinde etnomádenı birlestikter men aýdandyq Dostyq úıiniń syı-syıapatyna bólenýi Galına Dmıtrıevnanyń ǵıbratty ǵumyrynyń bıik bir belesi ispetti. Dýman ANASh, «Egemen Qazaqstan» Shyǵys Qazaqstan oblysy, Besqaraǵaı aýdany