Elbasy – Qarýly Kúshterdiń Joǵarǵy Bas qolbasshysy Nursultan Nazarbaev Almaty oblysynyń Zarechnyı kentinde ótken «Qaısar-2016» keshendi jattyǵýyn baqylady
Lańkestik pen ekstremızm álemniń tórt buryshynda kútpegen jerden qaýip týdyratyn ǵalamdyq qasiretke aınalyp barady. Táýelsiz Qazaqstan qorǵanys kúshteriniń mundaı qym-qýyt ýaqytta qalǵyp ketýge quqy joq. Jaýyngerlerdiń sheberligin shyńdap, batyldyǵyn baptaý eń aldymen bilikti komandırler men áskerı oqý-jattyǵý polıgondarynyń zaman talabyna sáıkes jasaqtalýyna tikeleı baılanysty. Zarechnyıdaǵy áskerı sheberlik jattyǵýy Qazaqstan qarýly jasaqtarynyń qyzmettik josparyna engizilgen joba bolatyn. Memleket basshysy sondyqtan da oraıly sátte osynda keldi.
«Qaısar-2016» atalatyn keshendi jattyǵýǵa Qazaqstan Respýblıkasy Memlekettik kúzet qyzmetiniń «Qalqan», Ulttyq ulannyń «Búrkit», Ishki ister mınıstrliginiń «Suńqar», Ulttyq qaýipsizdik komıtetiniń «Arystan», Almaty qalasy ishki ister departamentiniń «Arlan» jáne Qorǵanys mınıstrliginiń Bas barlaý basqarmasynyń arnaıy maqsattaǵy bólimsheleriniń jaýyngerleri qatysty. Al Ishki ister mınıstrliginiń arnaıy maqsattaǵy bólimsheleriniń jaýyngerlik jáne ádistemelik daıyndyq maqsatyndaǵy bul ortalyǵynyń qurylysy 2014 jyly bastalǵan. Qurylysqa tapsyrysty Qazaqstan Respýblıkasynyń Ulttyq ulany bergen.
Qazaqstan Ulttyq ulany bas qolbasshysynyń orynbasary, polkovnık Muhametqalı Satov jańa áskerı-ádistemelik ortalyq týraly bylaı dedi:
– Kásibı jattyǵý úshin jańadan salynǵan bul ortalyqtyń jalpy aýqymy 208 gektar jerdi alyp jatyr. Osy jerde Qazaqstandaǵy barlyq kúshtik qurylymnyń jattyǵýyna erekshe jaǵdaı jasalyp otyrǵanyn atap aıtqym keledi. Bizdiń «Alǵabas» dep atalatyn arnaýly áskerı-jattyǵý alańymyzǵa uqsas nysan álemde AQSh pen Iordanııada bar. Lańkestikke qarsy eń ozyq jattyǵý ortalyǵy sanalatyn mundaı áskerı keshen burynǵy TMD memleketteriniń birinde de joq. Jańa ortalyqta bir kúnde 2 myńnan astam jaýynger áskerı jattyǵý jasap, sheberligin shyńdaı alady.
...Aldymen aspan tósinde kók keńistigin qaqyrata jaryp dybystan jyldam eki áskerı ushaq ótti. Kóp keshikpeı polıgon aýmaǵyndaǵy mıkrofondardan lańkestik-ekstremıstik top músheleriniń eki birdeı polısııa qyzmetkerin ajal qushtyryp, bir avtobýsty kepildikke alǵany, endi bir toptyń eki jeńil kólikpen áýejaıǵa jedel bet alǵany habarlandy. Naǵyz maıdan bastaldy. Utqyr kúshter oıly qurylǵan josparlary arqyly tez arada lańkesterdiń jolyn kesti. Tikushaqtar qaýipti aýmaqty aınala ushyp, brondy tehnıkalar qashqyndar kóliginiń aldynan shyqty. Pýlemettiń ashy daýysy, aýyr zeńbirektiń shý shyǵaratyn arnaıy snarıadynyń dúmpýi polıgon ústin áp-sátte astan-kesteń etti.
Ekinshi operasııa kezinde kóp qabatty úıdiń ústine parashıýtsiz túsken jedel toptyń jaýyngerleri tómen qaraı jasyryn túrde arqanmen túsip, qaýip-qaterge bas tikti. Kenet jerdegi qýatty tehnıkanyń kúshimen shýly snarıadtardyń qos-qostan atylýynan keıin jaýyngerler ǵımaratqa tótennen kirip, lańkesterdiń bir tobyn aýyzdyqtady. Bul kezde aýyl syrtynda avtobýstaǵy kepilge alynǵan beıbit azamattar eshbir zardapsyz bosatylǵan-tyn...
Arnaıy toptar men áskerı tehnıkanyń úılesken qyzmeti arqasynda josparlanǵan barlyq operasııa sátti aıaqtaldy.
Dáriniń ıisi seıilip, tehnıkanyń daýysy óship úlgergen sátte sapqa tizilip, alańǵa jınalǵan jaýyngerlik bólimderdiń aldyna shyqqan Qazaqstan Respýblıkasynyń Prezıdenti – Qarýly Kúshterdiń Joǵarǵy Bas qolbasshysy Nursultan Nazarbaev Qazaqstan Respýblıkasy Ulttyq ulany 5572-áskerı bólimi men Qorǵanys mınıstrliginiń Bas barlaý basqarmasy 22750-áskerı bóliminiń komandırlerine saltanatty túrde ar-namys, aıbyn men dańq rámizi sanalatyn Jaýyngerlik týlardy óz qolymen tapsyrdy.
– Qurmetti generaldar men ofıserler! Serjanttar men soldattar! – dep sóz bastaǵan Joǵarǵy Bas qolbasshy Nursultan Nazarbaev ári qaraı bylaı dedi: «Búgin biz arnaýly maqsattaǵy jańa Jaýyngerlik jáne ádistemelik daıyndyq ortalyǵyn ashyp, onyń alǵashqy ázirligen kórip otyrmyz. Oǵan ushqyshtar men desanttar, zeńbirekshiler men arnaýly jasaq jaýyngerleri qatysty. Sarbazdar jattyǵý barysynda sheberlik pen batyldyq tanytyp, jaqsy daıyndyqtaryn kórsetti.
Memleket basshysy ortalyqta alǵashqy jattyǵýyn ótkizip otyrǵan jaýyngerlerdiń óz isine jan-tánimen mashyqtanýy jas memleketimizdiń múddesine qyzmet etetinin atap kórsetti. Álemniń ár túkpirinde bolyp jatqan lańkestik áreketter men Taıaý Shyǵystaǵy soǵys qımyldary jas Qazaq eliniń qandaı tótenshe jaǵdaı bolsa da tótep berýge daıyn bolýy kerektigin eskertedi. Qarýly Kúshterimiz qaı kezde de elimizdiń Táýelsizdigi men jerimizdiń bútindigin saqtaýǵa, týǵan Otanymyzdy qorǵaýǵa ázir bolýy tıis. Táýelsizdik jyldarynda Qazaqstan armııasy men arnaýly jasaqtarynyń jańasha ósip-órkendeý satysyna ótkeni, Qazaqstan Táýelsizdiginiń 25 jyldyǵy qarsańynda elimizdiń jańa mazmundaǵy, jańa turpattaǵy qorǵanys kúshteri qurylǵany búgingi áskerı jattyǵýlardyń aıasynda shyn máninde erekshe kórinis tapty, deı kele Elbasy bylaı dedi:
– Men Joǵarǵy Bas qolbasshy retinde ár kezde de áskerı quramǵa áleýmettik jaǵdaıy turǵysynan qoldaý kórsetip kelemin. Sizderdiń mindetterińiz – elimizdegi beıbit ómirdiń tynyshtyǵy men kelisimdi saqtaý bolyp tabylady. Sizder árdaıym Otan qorǵaýda janyn aıamaǵan aǵa urpaqtyń abyroıly isin jalǵastyrýshy bola bilińizder. Barshańyzdy alda kele jatqan Otan qorǵaýshy kúnimen shyn júrekten quttyqtaımyn. Bul da bizdiń Táýelsizdigimizdiń úlken belgisi bolyp sanalady. El irgesi ár ýaqytta bútin, halqymyz aman bolsyn. Otan qorǵaıtyn sizder aman bolyńyzdar, – dedi Prezıdent.
Budan soń Joǵarǵy Bas qolbasshy qyzmette erekshe kózge túsken birqatar áskerı qyzmetshige jańa páterlerdiń kiltin tabys etti.
Ulttyq ulannyń top komandıri kapıtan Nurjan Bilálov Joǵarǵy Bas qolbasshydan áskerı tártip boıynsha ruqsat surap, tilegin aıtty.
– Joǵarǵy Bas qolbasshy myrza! Búgin bizdiń elimizdegi qarýlastarym men óz basym úshin erekshe kún boldy. Birinshiden, bizder zaman talabyna saı jasaqtalǵan Áskerı ortalyqty paıdalaný quqyna ıe bolsaq, ekinshiden, Sizdiń óz qolyńyzdan páter kiltin alyp otyrmyn. Bul – men jáne meniń otbasym úshin úlken abyroı. Arnaıy jasaqtar atynan Sizge úlken alǵysymdy bildiremin. Sapqa turýǵa ruqsat etińiz...
Áskerı is-shara jaýyngerlerdiń saltanatty sherýimen aıaqtaldy.
Talǵat SÚIINBAI,
«Egemen Qazaqstan»
ALMATY
Sýretterdi túsirgender
S.BONDARENKO, B.OTARBAEV
