Qyzylordada 5 qabatty turǵyn úı paıdalanýǵa berildi

ASTANA. 1 mamyr. Qyzylorda qalasynda 1 – mamyr Qazaqstan halqynyń birligi kúni merekesine oraı 5 kópqabatty turǵyn úı paıdalanýǵa berildi. Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady. Saltanatty sharaǵa oblys ákimi Qyrymbek Kósherbaev qatysyp, qonys ıelerin qýanyshtarymen quttyqtady. «Baspana alý árbir otbasy úshin úlken qýanysh. Sondyqtan qonys toılaryńyz qutty bolsyn. Biz de qýanyshtaryńyzǵa ortaqpyz. 2015 jyly 54 kópqabatty úı salyp, paıdalanýǵa bergen bolatynbyz. Al bıyl 67 turǵyn úı salýdy josparlap otyrmyz. Sonda eki jyldyń ishinde úı kezeginde turǵan azamattardyń 24 paıyzy baspanaly bolady», – dedi Qyrymbek Kósherbaev. Sondaı-aq, aımaq basshysy óz kezeginde oblys ortalyǵyndaǵy jańadan qonys tepken shaǵyn aýdanda «Báıterek» UBH» aksıonerlik qoǵamy arqyly 640 páterlik 12 kópqabatty turǵyn úıdiń qurylysy júrgizilgenin aıtty. Onyń ishinde 370 páterdi quraıtyn 7 úı ótken jyly paıdalanýǵa berilgen. Sharada oblys ákiminiń qolynan jańa páterdiń kiltin alǵan Bahyt Nasyrova esimdi turǵyn qýanyshyn kópshilik aldynda sózben jetkizdi. Ol: «Men búgingi qýanyshymdy aıtyp jetkize alar emespin. Páter alý qashannan armanymyz bolatyn. Osy ıgi istiń basynda júrgen barlyq azamattarǵa alǵysymyz sheksiz. Qonys toılaryńyz qutty bolsyn», – dedi. Aıta keteıik, Qyzylordada turǵyn úı qurylysy jyl sanap artyp keledi. О́tken jyly 2684 otbasy baspanaly bolsa, 2016 jyly 3329 januıa páter kiltin alady. Búgin úıli bolǵandardyń kóbisi muǵalimder men dárigerler jáne memlekettik qyzmetkerler. Talǵat Raıymbek. Derek, foto: Qyzylorda oblys ákimdiginiń baspasóz qyzmeti.