Keshe Memleket basshysy Nursultan Nazarbaev Astanada ótken Otan qorǵaýshy kúnine arnalǵan merekelik sharaǵa qatysyp, quttyqtaý sóz sóıledi. Elbasy jınalǵandardy Otan qorǵaýshy kúnimen quttyqtady.
Ejelden-aq Otan qorǵaýshylar namys pen aıbardyń, erlik pen batyldyqtyń, patrıotızm men óz halqyna qaltqysyz qyzmet etýdiń úlgisi bolǵan.
Qazaqstandyqtar óz ómirin bostandyq pen táýelsizdik úshin qıǵan qaharmandardyń barlyǵynyń erligin jadynda saqtap keledi. Atalar men ákelerdiń jaýyngerlik nagradalary – qazaqstandyq otbasylar úshin baǵa jetpes jádiger. Bizdiń kúntizbemizde Otan qorǵaýshy kúni men Uly Otan soǵysyndaǵy Jeńis kúni merekesiniń qatar kelýiniń sımvoldyq máni bar. Bul bizdiń halqymyzdyń barlyq býynynyń dańqty jaýyngerlik dástúri sabaqtastyǵyn kórsetedi, dedi Qazaqstan Prezıdenti.
Nursultan Nazarbaev soǵys ardagerleri men tyl eńbekkerlerine aıryqsha alǵys aıtty. Uly Jeńis – bizdiń qaharmandyq tarıhymyz ben gıtlerlik fashızmdi tize qosyp eńsergen jáne talqandaǵan halyqtar dostyǵynyń sımvoly. Sizderdiń amandyqtaryńyz úshin jasalyp otyrǵan qamqorlyq – soǵystyń aýyr jyldarynda ózderińizdi qurban etkendikterińiz úshin qazirgi urpaqtyń kórsetken qurmetiniń bir bólshegi ǵana. Sizderdiń jaýyngerlik erlikterińizdi Qazaqstan eli eshqashan umytpaıdy. Jemisin búginde bizder, sizderdiń balalaryńyz kórip otyrǵan Uly Jeńis úshin, qaharmandyqtaryńyz úshin barlyq ardagerlerge basymyzdy ıip, rahmet aıtamyz, dedi Memleket basshysy.
Qazaqstan Prezıdenti Otan qorǵaýshy kúni – elimizdiń Qarýly Kúshteriniń qurylǵan kúni ekenin atap ótti. Bıyl biz osy aıtýly kúndi Táýelsizdigimizdiń 25 jyldyq mereıtoıyna daıyndyq aıasynda atap ótemiz. Ulttyq armııa, áskerı-áýe kúshterin jáne áskerı-teńiz flotyn qurý – egemen Qazaqstan shejiresindegi mańyzdy belestiń biri. Alǵashqy áskerı bólimderdi qalyptastyrýdan bastap, ulttyq qorǵanys pen qaýipsizdiktiń qazirgi zamanaýı júıesine deıingi úlken joldy júrip óttik. Eń zamanaýı qarýmen jáne tehnıkamen jabdyqtalý, komandırlerdiń kásibıligi, jeke quramnyń joǵary jaýyngerlik daıyndyǵy men mashyǵy – osynyń bári bizdiń Qarýly Kúshterimizge tán, dedi Nursultan Nazarbaev.
Memleket basshysy elimizde joǵary deńgeıdegi qorǵanys qabiletin qamtamasyz etý úshin qajetti nárseniń bári jasalyp jatqanyna nazar aýdardy. Qorǵanys shyǵystary qıyndyqtarǵa qaramastan basym tártip boıynsha qarjylandyrylady. Jaýyngerlik kezekshilikke qaıta jaraqtandyrý baǵdarlamasyna tolyq saı keletin jańa áskerı tehnıka túrleri shyǵady. Taıaý jyldarda qarý men tehnıkanyń barlyq túriniń 70 paıyzy, al jekelegen sanattar boıynsha 100 paıyzǵa deıini jańartylatyn bolady. Jyl saıyn júzden asa shuǵyl tekserý jáne áskerı oqý-jattyǵýlar qazirgi zamanǵy yqtımal soǵys jaǵdaıyna barynsha beıimdelip ótkiziledi, dedi Qazaqstan Prezıdenti.
Sonymen qatar, áskerı keshendi jańǵyrtý aıasynda otandyq qorǵanys ónerkásibinde tehnologııa transferti men ǵylymı aýqymdy óndiristerdi damytý turǵysynan birqatar mindetterdi oryndaý máselesi tur.
Qazaqstan Prezıdenti elimiz sheteldermen áskerı-tehnıkalyq yntymaqtastyǵy belsendi túrde damytylyp, al Qazaqstan Qarýly Kúshteriniń áskerı sheberligi UQShU jáne ShYU aıasyndaǵy birlesken jattyǵýlarda, NATO-men seriktestik baǵdarlamasy boıynsha ózara is-qımyldar barysynda shyńdalyp kele jatqanyn aıtty.
Memleket basshysy Otandy qorǵaý eń qurmetti kásip ekenin atap ótti. Ulttyq qorǵanys pen qaýipsizdikti nyǵaıtý kóp jaǵdaıda áskerı bilim berý salasyn damytýmen, áskerlerdiń moraldyq-saıası rýhyn kúsheıtýmen baılanysty. Búginde Qarýly Kúshterdiń jeke quramymen jumysty Qazaqstan halqy Assambleıasy qabyldaǵan Máńgilik El Patrıottyq aktisi negizinde qurý mańyzdy, dedi Nursultan Nazarbaev.
Qazaqstan Prezıdenti elimizdiń Qarýly Kúshteri árqashanda Táýelsizdiktiń, qoǵamdaǵy tatýlyq pen kelisimniń myzǵymas tiregi bolatynyna senim bildirdi. Áskerı qyzmetshilerge jáne qorǵanys kesheninde jumys isteıtin azamattyq tulǵalarǵa, barsha qazaqstandyqtarǵa joǵary patrıottyq jaýapkershilikteri men Otanymyzdy qorǵaýdy qamtamasyz etýge tikeleı qatystylyǵy úshin alǵys bildiremin, dedi Memleket basshysy.
Nursultan Nazarbaev jańa jahandyq ahýaldyń kúrdeli jaǵdaıynda álem jasampaz konstanta bolyp tabylatynyn atap ótti. Jalpyǵa ortaq álem halyqtar men elderdiń berik jáne senimdi qorǵany bola alady. Sondyqtan, men halyqaralyq qoǵamdastyqqa «Álem. XXI ǵasyr» atty manıfest arqyly úndeý tastadym. Bul – jahandyq soǵysqa qarsy kúsh jumyldyryp, adamzatty ózin-ózi joıý qaterinen saqtaıtyn sharalar qabyldaýǵa úndeý. Ol birneshe aıdan soń biz saltanatty túrde atap ótetin Semeı ıadrolyq synaq polıgony jabylýynyń 25 jyldyǵy qarsańynda erekshe ózekti bolyp otyr. Iаdrolyq qarýdan, halyqqa tóngen áskerı qaterden ada, senim jáne barlyq ulttyń yntymaqtastyǵy qaǵıdalaryna negizdelgen ádiletti álem qurylymyn qalyptastyrý – bizdiń syrtqy saıasatymyzdyń negizi. Ony ár qadam saıyn jaqyndata otyryp, biz týǵan jerimizdiń qorǵalýyn berik ári senimdi ete túsemiz, dedi Qazaqstan Prezıdenti.
Memleket basshysy barsha qazaqstandyqtardy Otan qorǵaýshy kúnimen jáne kele jatqan Jeńis kúnimen taǵy da quttyqtady.
* * *
Konserttik baǵdarlamada Qorǵanys mınıstrliginiń áskerı ansambli men estradalyq-sımfonııalyq orkestri solısteriniń, sondaı-aq, elimizdiń tanymal ártisteriniń oryndaýynda Otan týraly, onyń batyr uldary men jaýyngerleri týraly otandyq kompozıtorlardyń patrıottyq ánderi, mýzykalyq kompozısııalary shyrqaldy.
Mýzykalyq nómirlerdiń bári Qorǵanys mınıstrligi ansambliniń balet trýppasy ázirlegen bı qoıylymdar arqyly súıemeldenip, áskerı ómir men jaýyngerlik jattyǵýlardyń beınekórinisterimen aıshyqtalyp otyrdy.
Dınara BITIKOVA,
«Egemen Qazaqstan»
Sýretterdi túsirgender
S.BONDARENKO, B.OTARBAEV
* Aq tilekter aǵyny
Muhtar ALTYNBAEV, Parlament Senatynyń depýtaty, «Halyq qaharmany», armııa generaly: – Bul – úlken meıram. Elbasynyń Jarlyǵymen Qarýly Kúshterdiń qurylǵanyna bıyl 24 jyl tolyp otyr. Al Táýelsizdigimizge – 25 jyl. Bular – mańyzy zor merekeler. Aldaǵy Jeńis kúniniń de orny erekshe. Árbir merekelik sharanyń tárbıelik máni bar. Al mynadaı áskerı taqyryptaǵy sharalar jastarymyzdy eldik rýhqa, otansúıgishtikke shaqyratyny sózsiz. Otandy qorǵaý – el tynyshtyǵynyń kepili. Al tynyshtyq, beıbitshilik – el damýynyń tiregi. Merekede elge tek jaqsylyq tileımin. Elimiz aman bolsyn! Janııaz ShALBOLOV, Uly Otan soǵysynyń ardageri: – Men – soǵysqa qatysyp, 8 jyl áskerde bolǵan adammyn. Sondyqtan, bul merekeniń men úshin mańyzy aıryqsha. Al mundaı merekelik sharalarǵa arnaıy shaqyrtý alǵan soń, oǵan zor qýanyshpen, asa joǵary kóńil kúımen kelemin. Barsha otandastarymdy merekemen quttyqtaımyn. Alladan halyqtyń amanshylyǵyn tileımin. Qazir elimizdiń eńsesi bıik, halqymyzdyń turmysy túzý. Munyń bári beıbitshiliktiń, tynyshtyqtyń arqasy. Jastarymyz ósip-ónip, órkendeı bersin. Eńbekteri jana bersin, elin, Otanyn súısin! Baqytjan ERTAEV, Parlament Májilisiniń depýtaty,«Halyq qaharmany», general-leıtenant: – Biz osydan 25 jyl buryn Táýelsiz el bolyp, óz Otanymyzdy qorǵaý úshin bir sapta qatarǵa turdyq. Bul meıramnyń bir ereksheligi – Otan úshin qaza tapqan erlerimizdiń erligin eske alyp, olarǵa taǵzym etemiz. Bul merekeni atap ótýdiń negizinde tynyshtyqtyń bolashaǵy jatyr. Sebebi, bul kúni batamyzdy berip, tynyshtyqty tileımiz. Bolashaq el qorǵany – erlerimizdi eljandylyqqa baýlyp, otansúıgishtikke tárbıeleımiz. Meniń basty tilegim, elimizde eshqashan soǵys bolmasyn. Baıtaq jerimiz tutas, kópultty memleketimiz tatý bolsyn. Abaı TASBOLATOV, Parlament Májilisiniń depýtaty, general-leıtenant: – Otan qorǵaý – yqylym zamannan er adamnyń paryzy. Sondyqtan, bul meıram shen taqqan áskerılerdiń ǵana emes, búkil elimizdiń úlken meıramy. Er azamattyń patrıottyq sezimi bıik bolýy kerek. Otandy súıý degen el tarıhymen tamyrlas. Eline, jerine degen sezim ár azamattyń óz tarıhyn bilýimen úndesýi tıis. Eldi, Otandy jan aıamaı qorǵaý úshin árqashan erlerimizdiń boıynda zor patrıottyq, eljandylyq sezim esip turýy kerek. El patrıottaryn tárbıeleý – bárimizdiń mindetimiz bolsa, sol joldaǵy ıgi sharalardyń biri – Otan qorǵaýshy kúnin atap ótý ekendigi daýsyz.
