Saıypqyran serjant

Búginginiń batyry Ashat Qońyrov qasıetti Qarqaraly topyraǵynyń týmasy. Osy aýdandaǵy Arqalyq degen aýylda dúnıege kelgen. Áskerı qyz­metker bolýdy bala kezinen armandaǵan eken. Sol armany adastyrmapty. Búgingi kúnde serjant shenindegi bul azamat naǵyz áskerı qyzmetker. Onyń ústine beıbit kúnde erligimen kózge túsken batyrdyń ózi! Batyr demekshi, bizdiń aıtpaq oqı­ǵa­myz bylaı bolǵan edi. «Ortalyq» óńir­lik qolbasshylyǵyna qa­rasty №6505 ás­kerı bólimniń qyz­metshisi serjant Ashat Qońyrovtyń jumystan úıine kelgen beti-tuǵyn. Áskerı kıimin sheship úlgermeı kórshi pá­ter­diń terezesinen býdaqtap tútin shy­ǵyp jatqanyn kórip qalady. Esikti ashyp edi, kireberis kók tútin, tysqa shyǵý múmkin emes eken. Jyldam qımyldap, aldymen úıdegi kári enesin, odan keıin gaz ballonyn tysqa shyǵaryp úlgerdi. Sol ýaqytta aýlaǵa kómek surap shyqqan kórshi áıeldiń daýysyn estidi. О́rtke oranǵan páterde kári kisiniń qalǵanyn jáne propan  toly gaz ballony bar ekenin estigen serjant oılanyp ta jatpastan otqa qoıyp ketken. Aldymen gaz ballonyn terezeden tysqa laqtyryp, sonan keıin baryp bul kezde essiz jatqan keıýanany dalaǵa kóterip alyp shyqty. Sonda ǵana kórdi: shalbarynyń balaǵy janyp jatyr eken, etiginiń tabany da balqı bastapty... Sóıtip, syn saǵatta kózsiz erliktiń keremet úlgisin  kórsetken serjanttyń shıraq áreketiniń arqasynda kóp qabatty úıdiń  kireberisi aman qaldy. Iá, ıá, eger de gaz ballony jarylar bolsa, tutas podezdiń kúli kókke ushar edi! Bul oqıǵa ótken jyldyń qazan aıynda bolǵan edi. Búgingi kúnde Ashat túk bolmaǵandaı ózine júk­telgen mindetterdi tııanaqty atqaryp júr. «Mundaı jaǵdaıda sasyp qalmaı, durys sheshim qabyldaǵanyma qýanyshtymyn. Jalpy, kez kelgen áskerı adam meniń ornymda bolsa osylaı isteıdi dep oılaımyn. Jarǵyda jazylmaǵan. Biraq, adamdardy qutqarý, ásirese, áskerılerdiń qasterli mindeti!», – deıdi batyryń. «Qazirgi tańda Qazaqstan Respýblıkasy Ulttyq Ulany «Ortalyq» óńirlik qolbas­shylyǵyna qarasty № 6505 áskerı bóliminiń áskerı qyzmetshisi, serjant Ashat Qońyrovtyń erligi eskerilip, áskerı bólim basshylyǵyna marapatqa usynyldy», deıdi QR Ulttyq Ulany «Ortalyq» óńirlik qolbasshylyǵy baspasóz qyzmetiniń basshysy, maıor Qanat Dosuly. Ashattyń osy erligin oblys ákimi, áskerı bólimniń basshylyǵy da laıyqty túrde atap ótti. Budan bólek, tilsiz jaýdan aman qalǵan turǵyndardyń qutqarýshyǵa aıtar alǵysy da sheksiz boldy. Egemen elimiz úshin adam ómiri – baǵa jetpes baılyq bolsa, adam ómirin saqtap qalý – teńdessiz erlik. Al Ashat Qońyrov sekildi qaısar rýhty jigitterdi qalaı ǵana beıbit kúnniń batyry demeske?! Ashat qazir Qaraǵandy memlekettik tehnıkalyq ýnıversıtetinde syrttaı oqyp júr. Joǵary bilim alǵan soń ofıser bolyp, qol bastaý – aldaǵy maqsattyń biri. Keshke jumystan sharshap kelgeninde súıikti jary Aınur kúlimdep qarsy alady. Eki jastan asqan qulynshaǵy Aıarý júgirip kelip moınyna asylady. Mine, otbasynyń osyndaı yntymaǵy Ashattaı beıbit kúnniń batyryna kúsh beredi, aldaǵy maqsattaryna jetýine yntalandyrady. Qaırat ÁBILDINOV, «Egemen Qazaqstan» Qaraǵandy