Memleket basshysynyń tapsyrmalaryn oryndaý maqsatynda Úkimet otyrysynda birqatar sheshim qabyldandy
Keshe Úkimet Úıinde Premer-Mınıstr Kárim Másimov Memleket basshysy N.Á.Nazarbaevtyń 2016 jylǵy 5 mamyrdaǵy keńeste bergen tapsyrmalaryn júzege asyrý máseleleri boıynsha Úkimet otyrysyn ótkizdi, dep habarlady Premer-Mınıstrdiń baspasóz qyzmeti.
Otyrys barysynda Premer-Mınıstr «Prezıdent tarapynan jalpy Úkimetke jáne jeke mınıstrlikterge qatysty jer zańnamasyn júzege asyrý máseleleri boıynsha oryndy syn aıtylǵanyn» basa aıtty.
«Búgin biz Memleket basshysynyń tapsyrmalaryna sáıkes birneshe sheshim qabyldaýymyz qajet», – dedi K.Másimov.
Sonymen, Premer-Mınıstr mynalardy tapsyrdy:
- Ortalyq jáne jergilikti atqarýshy organdarǵa Memleket basshysy jarııalaǵan Jer kodeksiniń keıbir normalaryna kelesi jylǵa deıingi moratorııden týyndaıtyn sáıkes sharalar qabyldaý.
- Qysqa merzimde Premer-Mınıstrdiń birinshi orynbasary B.Saǵyntaevtyń basshylyǵymen Jer zańnamasyn túsindirý boıynsha komıssııanyń tıimdi jumysy úshin qajetti sharalar qabyldaý.
- Jer qatynastaryn retteý salasyndaǵy máselelerdi Ulttyq ekonomıka mınıstrliginen Aýyl sharýashylyǵy mınıstrligine tapsyrý.
- Investısııalar jáne damý mınıstrliginen aqparat salasyndaǵy sáıkes fýnksııalardy tapsyra otyryp, Qazaqstan Respýblıkasynyń jańa mınıstrligin qurý boıynsha qajetti rásimder júrgizý.
- Densaýlyq saqtaý jáne áleýmettik damý mınıstrligine mindetti medısınalyq saqtandyrýdy engizý boıynsha Is-qımyldyń jol kartasyn ázirleý.
- Bilim jáne ǵylym mınıstrligine orta mektepterde oqý jylyn uzartý máseleleri boıynsha jáne úsh tildi bilim berýdi engizý merzimderi týraly qoǵamnyń pikirin zertteý.
- Premer-Mınıstrdiń orynbasary Darıǵa Nazarbaevaǵa óńirlerdegi konsýltasııalyq ortalyqtarmen birge Úkimet janyndaǵy biryńǵaı sall-ortalyq – júrgizilgen reformalar týraly túsindirý úshin «jedel jeli» qurý.
«Jaýapty adamdardy bekitý qajet, bir de bir suraq jaýapsyz qalmaýy tıis», – dep atap ótti ol.
«Ár basshy óz quzyrettiligi aıasynda reformalardyń barlyq baǵyttary boıynsha qoǵamnyń qatynasyn taldap, óz qyzmetinde sáıkes túzetýler engizýi tıis», – dep basa aıtty K.Másimov.
«Memleket basshysynyń tapsyrmalaryn oryndaý boıynsha jemisti jáne konstrýktıvti jumys júrgizý qajet. Naqty aıtqanda, keshe el Prezıdenti bizge taǵy da senim bildirdi, endi biz ózimizdiń tıimdi jumysymyzben sol senimdi aqtaýǵa tıispiz», – dep túıdi Premer-Mınıstr.
