Partııa qýatty saıası kúsh bolyp qalýy tıis

Memleket basshysy Nursultan Nazarbaev «Nur Otan» partııasy saıası keńesiniń Bıýro otyrysyna qatysty, dep habarlady Prezıdenttiń baspasóz qyzmeti. Otyrys barysynda Memleket basshysy atqarǵan jumysy úshin A.Myrzahmetovke alǵys aıtyp, partııa Tóraǵasynyń jańa birinshi orynbasary M.Qul-Muhammedti tanystyrdy. Qazaqstan Prezıdenti partııa Tóraǵasynyń birinshi orynbasary retinde A.Myrzahmetovtiń ózine júktelgen mindetterdi oryndaǵanyn, parlament saılaýyn tabysty ótkizgenin atap ótti. Sondaı-aq, Nursultan Nazarbaev A.Myrzahmetovke jańa laýazymynda birqatar keshendi min­detterdi, sonyń ishinde jer má­se­lesiniń tıimdi sheshilýin júze­ge asyrý qajet bolatynyn aıtty. A.Myrzahmetov senim artqany úshin Nursultan Nazarbaevqa alǵys aıtyp, tapsyrylǵan jańa salada óz mindetin jaýapkershilikpen atqarýǵa daıyn ekenin bildirdi. Sonymen qatar, Memleket basshysy M.Qul-Muhammedtiń jýrnalıstik jáne zańgerlik bilimi bar ekenine, ár jyldary Parlament Senatynyń depýtaty, Prezıdenttiń baspasóz hatshysy, keńesshisi, Mádenıet mınıstri bolyp qyzmet atqarǵanyna nazar aýdardy. Qazaqstan Prezıdenti partııa Tóraǵasynyń jańa orynbasary partııanyń qyzmetin odan ári nyǵaıtý qajettigin eskere otyryp taǵaıyndalǵanyn, «Nur Otanda» bul úshin qarjylyq, kadrlyq jáne materıaldyq resýrstyń bári bar ekenin atap ótti. – Partııa qýatty saıası kúsh bolyp qalýǵa tıis. Barlyq pikir, ıdeıalar partııa tarapynan órbýi kerek. «Nur Otannyń» óziniń taldaý ortalyǵy bolýy qajet, – dedi Nursultan Nazarbaev. M.Qul-Muhammed ózine senim artylǵany úshin alǵys bildirip, partııanyń tıimdi jumys isteýin qamtamasyz etý úshin bar kúshi men bilimin jumsaıtynyn aıtty.