Astanada alǵash ret «Ásker barysy» týrnıri ótti

ASTANA. 8 mamyr. Astanada qazaq kúresinen Qorǵanys mınıstrliginiń Elbasy Nursultan Nazarbaevtyń júldesi úshin ótetin «Qazaqstan barysy» respýblıkalyq týrnırine  irikteý jarysy ótti. Bul týraly egemen.kz tilshisi habarlady. Jarysqa 16 balýan qatysty. Beldesýde bas júldeni Talǵat Ámirenov jeńip aldy. Ekinshi oryndy Arman Ábeýov, úshinshi oryndy Darhan Dáýitbekov ıelendi. «Qazaqstan barysy» qazaq kúresin damytý qorynyń tóraǵasy Arman Shoraevtyń aıtýynsha, jarys alǵash ret áskerıler arasynda ótti. Bul beldesýdiń maqsaty – qazaq kúresi qamtylmaı jatqan salalarda ulttyq kúresimizdi nasıhattaý, kúres dese delebesi qozatyn jigitterdiń úlken jarystarǵa shyǵyp, kórinýine múmkindik berý. «Qazirgi kezde stýdentter, jastar arasynda ulttyq kúresimizdi damytýdy qolǵa alyp jatyrmyz. Bolashaqta qazaq kúresin elimizdiń barlyq salalarynda qamtýdy maqsat etip otyrmyz», dedi Arman Tólegenuly. Jeńimpazǵa altyn belbeý men 300 000 teńge syıaqy, onyń jattyqtyrýshysyna 100 000 teńge syıaqy tabys etildi. Sonymen birge ol «Qazaqstan barysy» respýblıkalyq týrnıriniń fınalyna joldama aldy. Júldegerlerge baǵaly syılyqtar men medal, dıplom tapsyryldy. Dastan Kenjalın. Derek, foto: «Qazaqstan barysy» qazaq kúresin damytý qory.