Kásipqoı boksshy Qanat Islam 21-jeńisine qol jetkizdi (vıdeo)

ASTANA. 9 mamyr. Búgin birinshi orta salmaqta baq synaıtyn qazaqstandyq kásipqoı boksshy Qanat Islam sharshy alańdaǵy kezekti jeńisine qol jetkizdi. AQSh-tyń Leıklend qalasynda ótken boks keshinde ol kolýmbııalyq Hýan De Anhelmen kezdesip, 6-raýndta qarsylasynan tehnıkalyq nokaýtpen basym tústi. Bul týraly egemen.kz tilshisi habarlady. Jekpe-jektiń alǵashqy sekýndtarynan bastap alǵa umtylǵan otandasymyz birinshi raýndtyń ózinde birneshe joıqyn soqqy jumsap úlgerdi. Degenmen, qarsylasy Qanattyń shabýylyna laıyqty toıtarys berip, ózi de qarymta shabýylǵa shyǵýdy umytqan joq. Ekinshi raýndta da jerlesimiz birinshi nómirmen judyryqtassa, Hýan De Anhel kóbine qorǵanýǵa májbúr boldy. Úshinshi raýndta Qanat qarqynyn sál báseńdetkenimen, jumsaǵan soqqylary dittegen jerine dóp tıip jatty. Kelesi kezeńde jattyqtyrýshysynyń sózine qulaq asqan bizdiń boksshy taǵy da ekpinin baıaýlatty. Alaıda, raýnd sońynda shabýylyn kúsheıtken ol De Anheldi soqqynyń astyna aldy. Kolýmbııalyqtyń baǵyna oraı dál sol mezette raýnd aıaqtalyp, ol nokdaýnnan aman qaldy. Kelesi besinshi raýnd ta aldyńǵylaryndaı qazaqstandyqtyń basymdyǵymen ótti. Ýaqyt ótken saıyn qarqynyn kúsheıtken Qanattyń soqqylarynan eseńgiregen kolýmbııalyq úshin eki aıaqqa turýdyń ózi muńǵa aınaldy. Áıtse de, bul joly da ony raýndtyń aıaqtalǵanyn bildiretin gong qutqaryp qaldy. Al altynshy raýndta De Anheldiń kúshi sarqylyp, nokdaýnǵa tústi. Alaıda, jekpe-jekti jalǵastyrýǵa múmkindik tapqanymen, esin tolyq jınap úlgermegen kolýmbııalyqtyń odan árige shamasy jetpedi. Nátıjesinde tóreshi jekpe-jekti toqtatyp, Qanat Islamnyń jeńiske jetkenin habarlady. Osylaısha, jerlesimiz kásipqoı rıngtegi 21-jeńisine qol jetkizip otyr. Buǵan deıin 21 jekpe-jek ótkizgen Qanattyń sonyń 18-inde merziminen buryn jeńiske jetkenin atap ótken jón. Taǵy bir nazar aýdarar jaıt, Islam men De Anhel kezdesýi 10 raýndqa josparlanǵan bolatyn. Elaman Qońyr. Derek: egemen.kz. Foto: vk.com.