Jeńis kúngi jeńis

Qanat Islam qarsylasyn 6-raýndta nokaýtqa jiberdi Keshe, 9 mamyr kúni tańerteń AQSh-tyń Florıda shtatyn­daǵy Leıklend qalasynda jerlesimiz Qanat Islam kolýmbııalyq qarsylasy Hýan De Anheldi 6-raýnd­ta tehnıkalyq nokaýtpen jeńdi. Sóıtip, 21 ury­synyń bárin jeńispen aıaqtaýǵa qol jetkizdi. Ol osymen óziniń 18-shi shaıqasyn merziminen buryn bitirip otyr. Qazaqstandyq sportsúıer qaýym jerlesteriniń bul jekpe-jegin kópten asyǵa kútti. Mu­nyń jóni bar. Kásipqoılar rın­gine aýysqanyna 3,5 jyldaı ýaqyt bolǵan Qanat áli elıtaly topqa jaqyndaı almaı ke­le jatyr edi. Al Premier Boxing Champions boks shoýy sheńberinde uıymdastyrylǵan bul aıqas so­ǵan qa­­­raı naqty qadam bastyrdy. Osy joly Qa­nat­tyń ká­sip­qoılar tobyndaǵy shaıqasy «Qazaq­stan» te­le­ar­­nasynyń tikeleı efırinen birinshi ret kórsetildi. Jekpe-jek aldynda maqsaty óziniń jankúıerlerin qýandyrý bolǵanyn jetkizgen bizdiń boks­shy salǵannan sol mejege jetý úshin baryn saldy. Biraq bul birden ońaı bola ketken joq. Buǵan, shamasy, qarsylasynyń salmaǵy aýyrlaý, denesi de úlken jáne qoldary uzyn bolǵany aıtarlyqtaı áser etken sııaqty. Bezben urys qarsańyndaǵy resmı ólsheý úderisinde qazaqstandyq sportshynyń salmaǵy 152,8 fýnt bolsa, qarsylasynyń 154,2 fýnt tar­tatynyn kórsetip berdi. M­unyń ústine, 28 jasar Hýan­nyń kásipqoılar sharshy alańy tósindegi tájirıbesi 31-degi Qanattyń tergenderinen tómen bolmaı shyqty. Kolýmbııalyq bylǵary qolǵap sheberi qazirge deıin 22 ret qarsylastarymen qolǵap túıistirip, solardyń 18-inde mereıin ústem etken eken. Budan bólek, 3 kezdesýdi teń aıaq­tap, 1 oıynda jeńiliske ushy­raǵan. Al nokaýttary sanyn 17-den qaıyrypty. Demek, 1 urysty ǵana upaı sanymen utqan. Osynyń ózi onyń joıqyn kúshtiń ıesi ekenin bildiredi. Qanat Islam 2010 jyly óziniń ata-babalary mekeni – Qazaqstan jerine turaqty qonys tebý úshin keledi. 2011 jyldyń qańtarynda elimizdiń azamaty bolady. Al 2012 jylǵy qyrkúıekten kásipqoılar rınginde shaıqasa bastady. Ondaǵy birinshi shaıqasyn 28 qyrkúıekte ótkizdi. Sol jylǵy 19 jeltoqsanda WBA Fedecaribe nusqasy boıynsha birinshi orta salmaqta alǵashqy ataǵyna qol jetkizdi. Taǵy bir aıta ketetin jaıt, Qanat kásipqoılar rıngine qa­dam basqaly «Qazaq» degen laqap atpen shaıqastarǵa shy­ǵady. Jáne onyń qujattaǵy aty-jóni de Qanat Islam emes, Qanat Islamuly. Ol dál qazirgi tań­da BoxRec reıtıngisinde 74 upaı­men 79-shy pozısııada tur. Bul bizdiń boksshymyzdyń joǵary órleı túsý úshin áli talaı ter tógýi kerek ekenin, sol arqyly bedel-deńgeıleri joǵary sheberlermen kóbirek shaıqasýy tıis ekenin kórsetedi. Osy jyldardyń bárinde oǵan Baýyrjan Ospanov esimdi qazaqstandyq kásipker udaıy demeýshilik jasap keledi. Boksshy kópten beri AQSh-tyń Nıý-Iork qalasynda turyp, jat­tyǵyp júr. Endi Qanat Islam men Hýan De Anhel arasyndaǵy jekpe-jek jaıyna keleıik. Shaıqas alǵashqy sekýndtardan bizdiń jerlesimizdiń shabýylymen bastaldy. Ol birden órshelene alǵa umtyldy. Qoldary uzyn, tulǵasy zor qarsylasyn ózine baǵyndyrýdyń, yrqyna kóndirýdiń, sóıtip, týra soqqylar jasaı alýdyń birden-bir joly da osy edi. Alaıda, Anhel jaǵ­daıdyń bulaısha órbýin aldyn ala kútken sııaqty. Ol Qanat­tyń ekpinin basa otyryp, ózi de birneshe jaqsy soqqy jasap úl­gerdi. Bul kezde bizdiń boks­shynyń utyp shyǵatynyna asa bir kúshti senim bolǵan joq. Ekinshi raýnd ta osy izben ketti. Taǵy da Qanat birinshi nómirmen oınasa, Hýan qarsy shabýyldy kóbirek dittedi. Al úshinshi kezeńde qazaq boksshysynyń qarqyny sál báseńdep ketti. Áıtkenmen, birneshe soqqysy qarsylasyna dóp tıip, ony azdap teńseldirip jibergendeı boldy. Kelesi raýndta Qanat jattyqtyrýshysynyń nusqaýymen belsendiligin buryn­ǵydan da tómendetip aldy. Biraq raýnd sońynda kenet jyldam aınalymǵa túsken onyń qýatty qarqyny kolýmbııalyqty qatty sastyrdy. Ony surapyl soq­qylardan tek gong daýsy ǵana aman alyp qaldy. Besinshi raýnd ta Qanattyń basymdylyǵymen ótti. Al altynshy raýnd báriniń núktesin qoıyp berdi. Qanattyń bir joıqyn soqqysy kenet ar­bıǵan kolýmbııalyqty jalpasynan túsirdi. Odan es jıyp, endi ortaǵa kele bergeninde taǵy bir soqqy jerge otyrǵyzyp tastady. Sodan Hýan esin durys jııa almady. Muny baıqaǵan arbıtr birden jekpe-jekti toqtatty. Bir aıta ketetin jaıt, Qanat Islam ózi utqan 15 urysty al­ǵashqy úsh raýndta bitirse, sonyń 7-eýine birinshi raýndta qol jet­kizgen edi. Sóz oraıy kelgende, taǵy bir jańalyqtyń jaıyn aıtyp ótpekpiz. Mamyrdyń 8-i kúni AQSh-tyń Las-Vegas qalasynda 72, 6 kg salmaqtaǵy meksıkalyq Saýl Alvares brıtanııalyq Amır Handy 6-raýndta nokaýtpen utyp, óziniń Búkilálemdik boks keńesiniń (WBC) nusqasy boıynsha álem chempıony ataǵyn qorǵap qaldy. Osydan keıin onyń ókili De La Hoııa Gennadıı Golovkınniń promoýteri Tom Lefflerge shyǵyp, jaqyn arada óz shákirtteriniń bir-birimen qolǵap túıistirý múmkindikteri týraly sóz qozǵady. Taraptar shaıqastyń dálme-dál ýaqyty jóninde aldaǵy kúnderde kelisimge kelýge uıǵarym jasasty. Serik PIRNAZAR, «Egemen Qazaqstan»