Keshe, 9 mamyr kúni Uly Otan soǵysyndaǵy jeńistiń 71 jyldyǵyn merekeleý aıasynda Astana jáne Almaty qalalarynda «Máńgilik polk» aksııasy bolyp ótti. Sherý túrinde qanat jaıǵan sharaǵa Uly Jeńiske taǵzym etetin, sol teńdessiz jeńisti ákelgen atalarynyń óshpes erlikterine bas ıetin jurtshylyq qatysty.
«Máńgilik polk» – sońǵy jyldary Uly Jeńis kúni ótkizilip kele jatqan halyqaralyq qoǵamdyq marsh-aksııa. Onyń barysynda kolonna túzip júrýshiler qoldaryna Uly Otan soǵysyna qatysqan jaqyndarynyń sýretteri men transporanttar alyp shyǵyp, olardyń rýhtaryn ulyqtaı túsedi. Aksııa birinshi ret 2007 jyly Reseıdiń Túmen qalasynda qolǵa alynǵan. Sodan keıin búkil eldi qamtyp, bara-bara álemniń kóptegen elderine taraı bastady. 2013 jyly osy saptan Qazaqstannyń Semeı, Ekibastuz qalalary da tabyldy. Al 2015 jyly jahannyń 15 eli aksııany qoldaýshylar qataryna qosyldy. Olardyń leginde Reseıden bólek, Qazaqstan, Avstrııa, AQSh, Ázerbaıjan, Belarýs, Germanııa, Izraıl, Irlandııa, Qyrǵyzstan, Mońǵolııa, Norvegııa, Ýkraına, Estonııa sekildi elder boldy. Bıyl bul tizim Avstralııa, Argentına, Bolgarııa, Grýzııa, Italııa, Kanada, Katar, Malta, OAR, Serbııa, Shveısarııa, Ulybrıtanııa memleketterimen tolyqty. Jalpy sany 26-ǵa jetken elderdegi 600 qalada ótetin aksııaǵa 24 mln. adam atsalysty.
Astana qalasynda bıyl ótken shara 5 myń adamnyń basyn biriktirdi. О́tken jyly birinshi ret qolǵa alynǵan aksııa 1,5 myń adamnyń sapyn túzgen edi. Bul ulaǵatty urpaqtar sapyn elorda turǵyndary men qonaqtar ózderiniń otbasy múshelerimen, balalarymen birge qurady. Qatysýshylar «Astana mall» saýda, oıyn-saýyq ortalyǵynan shyǵyp, Táýelsizdik dańǵyly boıymen júrip otyryp, «Otan qorǵaýshy» monýmentine deıingi 1,8 shaqyrym jerdi kókteı ótti. Olar qoldaryna Uly Otan soǵysynda qaza bolǵan atalary men ákeleriniń portretterin ustap, soǵys jyldaryndaǵy ánderdi shyrqady. Keýdelerin maqtanysh pen órlik sezimi kernegen sherýshiler sońynan atalmysh monýmentke gúl shoqtaryn qoıdy.
Dańqty erlerdiń rýhtaryna taǵzym etýge arnalǵan shapaǵatty sharadan Almaty qalasy da tys qalǵan joq. Bul kúni ońtústik astanada sorǵalap jańbyr jaýyp turdy. Biraq aksııaǵa jalyn qosýshy ártúrli jastaǵy jurtshylyq ókilderi nóserdiń tópeýine qaramastan, «Astana» alańyna bir kisideı uıymshyldyqpen jınaldy. Sol jerden sherýshiler legi 28-shi panfılovshylar atyndaǵy parkine deıin jaıaý júrip jetti. Osy alqapta olar «Máńgilik alaýǵa» gúl shoqtaryn aparyp qoıdy.
Munda da sherý boıynda jurtshylyq qoldaryna Uly Otan soǵysyna qatysqan ákeleri men atalarynyń, týǵan-týystarynyń portretterin zor maqtanyshpen joǵary ustap kele jatty. Aýǵan soǵysy ardagerleriniń úılestirýshi keńesiniń tóraǵasy Murat Ábdishúkirov sharanyń bıyl osymen úshinshi ret ótkizilip otyrǵanyn atap ótti. Ol sondaı-aq qatysýshylar qatary jyl sanap kóbeıip kele jatqanyna da nazar aýdardy. «Búgin bul jerge Uly Otan soǵysyna qatysyp, Otan úshin qan tókken ata-babalarymyzdyń sanaly urpaqtary keldi. Aksııa aǵa urpaqtyń erlikteri eshqashan umytylmaıtynyn, búgingi urpaqtyń beıbitshilikti, Qazaqstanyń ósip-órkendeýin qalaıtynyn bildirdi», – dedi ol.
«Myna sýrette meniń atam beınelengen. Ol soǵysqa alǵashqy kúnderden alynyp, 1945 jylǵy Jeńiske deıin shaıqasqan. Ol beıbit zamanda ómirden ótti. Men bul aksııaǵa ekinshi ret qatysyp jatyrmyn. Adamdardy osylaısha Otanǵa degen zor súıispenshilik sezimniń biriktirip jatqany meni erekshe qýantady», – dedi almatylyq Aleksandr Sokolov.
Uıymdastyrýshylardyń aıtýlarynsha, Almaty qalasynda aksııaǵa qatysýshylar sany 20 myńǵa jetken.
Rýslan IGILIK
