Keshe Astanadaǵy «Otan qorǵaýshy» monýmentine Uly Otan soǵysyndaǵy Jeńistiń 71 jyldyǵyna oraı saltanatty gúl qoıý rásimi ótti. Saltanatty sharaǵa Premer-Mınıstr Kárim Másimov, Parlament Senatynyń Tóraǵasy Qasym-Jomart Toqaev, Parlament Májilisiniń Tóraǵasy Baqtyqoja Izmuhambetov, Memlekettik hatshy Gúlshara Ábdiqalyqova, Qorǵanys mınıstri Imanǵalı Tasmaǵambetov, soǵys jáne eńbek ardagerleri, memlekettik organ basshylary, sondaı-aq, Uly Otan soǵysynda qaza bolǵan qazaqstandyqtardy eske alý úshin jınalǵan elorda turǵyndary men qonaqtary qatysty.
«Otan qorǵaýshy» eskertkishine gúl qoıý rásimi Memlekettik kúzet qyzmeti Prezıdenttik orkestriniń oryndaýyndaǵy mýzykalyq shyǵarmalarmen súıemeldendi. Soǵys kezinde jáne odan keıin de halyqqa jiger berip, rýhanı azyq bolǵan áýezdi týyndylardyń oryndalýy sharaǵa qatysýshylardy erekshe kúıge bóledi. Jınalǵan qaýymnyń júzinen qýanysh pen tolqynys, erekshe maqtanysh sezimi anyq baıqalyp turdy. Osy kúni «Otan qorǵaýshy» eskertkishine 1 500-ge jýyq gúl shoqtary qoıyldy.
Merekelik sharaǵa qurmetti qonaq retinde shaqyrylǵan Uly Otan soǵysynyń 45 ardagerine erekshe iltıpat kórsetildi. О́kinishke qaraı, jyl ótken saıyn elimizde soǵysqa qatysqan, tyldaǵy eńbegimen Uly Jeńisti jaqyndatqan ardaqty ardagerler qatary azaıyp keledi. Osy oraıda, jurtshylyq, ásirese, jastar jaǵy qaharman ardagerlerdiń denine saýlyq tilep, olardyń erligi máńgilikke el jadynda qalatynyn jetkizdi.
Merekelik jıyn barysynda Ánuran shyrqalyp, qan maıdanda erlikpen qaza bolǵan otandastarymyzdyń rýhyna taǵzym jasalyp, bir mınýt únsizdik jarııalandy.
Gúl qoıý rásimi aıaqtalǵannan keıin sharaǵa qatysqan qonaqtar áskerı túrli taǵamdardan dám tatty. Al jeńimpaz ardagerler arnaıy shatyrlarda demalyp, jergilikti ákimdik tarapynan syılyqtar aldy.
«Barlyǵy jaqsy ótip jatyr. Shatyrdyń ishinde ardagerlerge arnaıy konserttik baǵdarlama uıymdastyrdyq. Qalalyq ardagerler keńesiniń tóraǵasy bizdiń jumysymyzdyń basy-qasynda júrdi. Ústel basynda izgi, jyly tilekter aıtyldy. Barlyǵyn quttyqtadyq. Olar jaqsylap tamaqtandy. Maıdan dalasynda ózderine qýat bergen sarbaz botqasynan dám tatty. Arnaıy syılyqtar úlestirdik. 11 shatyr tigildi. Ardagerlerdi qalaı kútetinimiz týraly arnaıy jospar qurylǵan bolatyn», – dedi jıyndy uıymdastyrýshylar.
– Barshańyzdy Jeńis merekesimen quttyqtaımyn! Zor densaýlyq tileımin, aman bolyńdar, balalarym! Aspanymyz ashyq, beıbitshilik bolsyn! Halqymyz ben elimizge ıgilik pen ósip-órkendeý tileımin! – dedi Uly Otan soǵysynyń ardageri Rátbaı Medetbekov.
Al UOS ardageri Ázimbaı Maıryqov: «Elimiz tynysh bolsyn. Halqymyz aman bolsyn. Halyqpen birge báriń de aman bolyńdar. Soǵys bolmasyn. Jastar óse bersin!» – dep aq batasyn berdi. Sol sııaqty, bir top tyl ardageri búgingi merekeniń mán-mańyzyn, sondaı-aq, elimizdiń ósip-órkendeýi ishki birlik pen yntymaqtyń bolýyna tikeleı baılanysty ekenin aıta kelip, búgingi Qazaqstannyń ustanǵan baǵytynan jańylmaýyn tiledi.
Uly Otan soǵysyndaǵy Jeńistiń 71 jyldyǵyn merekeleý qarsańynda jergilikti atqarýshy organdar ardagerlerdi qoldaý, olarǵa qurmet kórsetý sharalarynyń aýqymdy josparyn iske asyrýda. 2016 jylǵa arnalǵan jergilikti bıýdjette ardagerlerge bir jolǵy materıaldyq kómek kórsetý úshin 2,6 mlrd. teńge qarastyrylǵan. Al astanalyq ardagerler bıyl 1 mln. teńgeden alady dep sheshim qabyldanǵan. Bul – respýblıka boıynsha eń joǵary materıaldyq kómek.
Eske sala keteıik, 2016 jyldyń 1 sáýirindegi málimetke súıensek, Qazaqstanda UOS-qa qatysqan 3668 ardager, 146 342 tyl ardageri, 220 Lenıngrad qorshaýyn kórgen azamat, 548 konslager tutqyny turady.
Joldybaı BAZAR,
«Egemen Qazaqstan»
Sýretterdi túsirgen
Erlan OMAROV
