Muz aıdynyndaǵy básekeler

kún sanap qarqyn alyp, qyza tústi 6 mamyrda Reseıdiń Máskeý jáne Sankt-Peterbýrg qalalarynda hokkeıden kezekti 80-shi álem chempıonaty bastaldy. Oǵan qatysýshy 16 komanda eki topqa bólinip, eki qalada irikteý týrnıri oıyndaryn ótkizip jatyr. Bulardyń qatarynda byltyr birinshi dıvız­ıon­nan shyqqan Qazaqstan hokkeıshiler jasaǵy da bar. Jahandyq jarys alǵashqy kúnderden sensasııalar men kút­pegen oqıǵalarǵa toly boldy. Ol Máskeýde Shvesııa men Latvııa, Sankt-Peterbýrgte AQSh pen Ka­nada quramalary arasyndaǵy kezdesýlermen bastaldy. Alǵashqy sensasııa bulardyń birinshi jubynda tirkeldi. Asa tartysty ótken matchtyń negizgi ýaqytynda jeńimpazdar anyqtalmady. La­tysh­tar ózderinen qashannan bir ıyǵy joǵary turyp kelgen shvedterge over-taımda ǵana ese jiberip aldy. Esep – 1:2. Al Amerıkanyń eki quramasy arasyndaǵy match­ta «Úıeńki japyraǵy eliniń» hokkeıshileri tústiktegi ejelgi qarsylastaryn 5:1 etip talqandap shyqty. Muny da sensasııaǵa balaýǵa bolatyn shyǵar. Bul kúni sondaı-aq, alań ıeleri – Reseı terme jamaǵaty kútpegen jerden Chehııadan 0:3 bolyp utylyp qaldy. Al Fınlıandııanyń Belarýsti 6:2 etip utýyn mamandar qalypty jaǵdaı retinde qabyldady. Kelesi kúni sensasııany Qazaq­stannyń muzdy aıdyn serileri ómirge ákeldi. Olar ózderinen desi basym, negizinen túbi kanadalyq oıynshylardan quralǵan Shveısarııa komandasymen negizgi ýaqytta da, qosymsha kezeńde de 2:2 esebimen teń tústi. Budan keıin býllıtte Naıdjel Doýstyń mergendigi arqasynda qarsylasynan jeńisti sońǵy mezette tartyp áketti. Bizden alǵashqy shaıbany Roman Savchenko óz alańy bette, kók syzyqtyń boıynda uryp, qarsy qaqpanyń «toǵyzdyǵyna» túsirý arqyly soǵyp, esepti teńestirdi. Ekinshi shaıbany Roman Starchenko saldy. Bul kúni taǵy bir sensasııany Chehııadan býllıt qorytyndysynda 3:4 bolyp utylǵan Latvııa jasady. Al Danııa Norvegııany 3:0, Slovakııa Vengrııany 4:1, AQSh Belarýsti 6:3 etip utty. Fran­sııa Germanııany býllıtten 3:2 esebimen súrindirdi. Mamyrdyń 8-i kúni Qazaqstan quramasy Reseı komandasymen úshinshi kezeńniń basyna deıin 4:4 bolyp teń túsip turyp, taǵy bir sensasııa jasap kete jazdady. Tek sodan keıin kópshilik bolyp oınaǵan sátterin tıimdi paıdalanyp ketken alań ıeleri 6:4 (3:3, 1:0, 2:1) ese­bimen jeńip ketti. Jeńimpazdar sapynan Evgenıı Dadonov (7-mınýt), Roman Lıýbımov (10, 49), Sergeı Mozıakın (12) jáne Anton Belov (39, 44) mergendikterimen kózge tússe, qazaqstandyqtar qatarynda Dastın Boıd (9), Roman Starchenko (10), Evgenıı Rymarev (20), Maksım Semıonov (41) gol saldy. Al qalǵan oıyndar mynadaı nátıjeler ákeldi: Norvegııa – Shveısarııa 4:3 OT, Shvesııa – Danııa 5:2, Vengrııa – Kanada 1:7, Fınlıandııa – Germanııa 5:1, Fransııa – Slovakııa 1:5. Osy oıyndardan keıin A tobynda Shvesııa, V tobynda Kanada 6 upaımen top bastady. Rýslan IGILIK