Eki birdeı pýlemettiń únin óshirgen

Ortalyq alańdaǵy radıodan shyqqan Levıtannyń úni aýyl shyrqyn bir-aq kúnde buzdy. Soǵys bastalǵanyn estigen jurt shań kóshede ári-beri sabylysty da qaldy. Ár úıdegi tepse temir úzetin jigitter soǵysqa attana bastady. Bireý úshin atpaldaı azamat bolǵanymen, olar anasynyń, ákesiniń baýyr eti balasy edi. Otan aldyndaǵy boryshyn óteýge Kúrshim aýdanyndaǵy, Jolnusqaý aýylynyń týmasy Qusman Jonsaǵatov ta attandy. Aýdan ortalyǵyna qaraı keıbireýi at arbamen, endi biri jaıaý-jalpy ketip jatty. Jyldar óte jasy jet­kenderdiń maıdan dalasyna attanyp jatýy qalypty jaǵdaıǵa aınaldy. Eldiń de eti úırendi. Biraq jarysa ushqan qorǵasyn oq pen snarıadtardyń arasynan aman shyǵý bir Allanyń ǵana qolynda edi. Qusman Jonsaǵatov Kúr­shim­nen shaqyrylyp maı­dannyń bel ortasyna túsedi. Gvardııalyq artıl­lerııa­lyq polkte zeńbirek­shi­ler komandıri bolady. Kes­ki­les­ken urystardyń birinde starshına Jonsaǵatov Regıtten aımaǵynda eki pýlemettiń kózin joıa­dy. Pýle­met­ten qarsha boraǵan oq tolastar emes. Keńes áskeriniń bas kóterýge múmkindikteri qalmaı bara jatady. Sonda amaly taýsylǵan Qusman jer baýyrlap baryp, jaýǵa kútpegen jerden oq atady. Atqan oǵy pýlemet tizginindegi nemisti sulatyp túsiredi. Endi ekinshi pýlemettegi jaý áskeri Qusmanǵa baǵyttap oq jaýdyrady. Aılasy asqan starshına ol pýlemettiń de únin óshiredi. Osydan keıin erligin baıqaǵan basshylyq Qusman Jonsaǵatovty «Qyzyl Juldyz» ordenimen marapattaıdy. Keıinnen jaıaý ásker Latvııadaǵy Aıvıekste ózeninen ótken kezde atqyshtar komandıri Jonsaǵatov dushpannyń mınometi men baqylaý pýnktin joıyp jibe­re­di. Bul batyldyǵy «Erligi úshin» medaline laıyq dep tabylady. Shyǵys Prýssııa maıdanynda, Kenıgsberg qalasyn jaýdan azat etýge qatysady. 1945 jyly III dárejeli «Dańq» ordenimen marapattalǵan. Gvardııa starshınasy  Qusman Jonsaǵatov 1946 jyly zapasqa shyǵarylǵan. Artyndaǵy urpaqtary ol kisiniń erlikteri jaıly Reseıdiń «Podvıg naroda» saıtynan oqyp biledi.  Sovet Sálıev, Zaısan qalalyq aqsaqaldar uıymynyń tóraǵasy  Shyǵys Qazaqstan oblysy