Qasterli meıramdardyń biri

Qyzylordada Uly Jeńis merekesine arnalǵan «Qaharman urpaqqa myń taǵzym» atty rásim ótti. Sharaǵa Uly Otan soǵysy jáne tyl ardagerleri bastaǵan Syr jurtshylyǵy qatysty. Aldymen qan maıdannan oralmaǵan bozdaqtar bir mınýt únsizdikpen eske alyndy. Sodan soń jınalǵan qaýym «Máńgilik alaýǵa» gúl shoqtaryn qoıdy. Ekinshi dúnıejúzilik soǵysqa Syr óńirinen 70 myń sarbaz attansa, sonyń teń jartysyna jýyǵy elge oralǵan joq. Qazir aımaqta 64 maıdanger bar. – Uly Otan soǵysy Otany men tarıhı ádildik úshin jan qııýǵa daıyn qaharman halqymyzdy kúlli álemge tanytqan qasıetti maıdan bolsa, Uly Jeńis – sizderdiń erlikterińizdi Máńgilik El jadynda saqtaýǵa arnalǵan eń qasterli mereke. Bul Jeńis bolmaǵanda, búgingi Táýelsiz Qa­­zaqstan da bolmas edi. Son­dyqtan, da Uly Jeńiske ólsheý­­siz úles qosqan árbir arda­­gerge keıingi urpaq atynan myń márte alǵys aıtamyz. Bar­sha­ńyzdy Uly Jeńis kúnimen shyn júrekten quttyqtaımyn,– dedi oblys ákimi Qyrymbek Kósherbaev. Munan soń «Jasampaz jasaq» sherýi ótti. Bul joba bıyl qata­ry­­nan tórtinshi jyl júzege asyp otyr. Erikti azamattardan qu­ralǵan sherý sapynda Uly Otan so­ǵysynda sheıit bolǵan, elge oralǵan, Semeı-Nevada, Cher­no­byl apaty, Aýǵan soǵysy arda­gerleriniń urpaqtary, batyr analar, jastar bar. Bul – búgingi ur­paq zulmat soǵysta keýdesin oq pen otqa tosqan jaýynger babalaryn umyt­paıtyndyǵynyń bir kórinisi. Erjan BAITILES, «Egemen Qazaqstan» QYZYLORDA