Úndistanda 72 jastaǵy áıel alǵashqy sábıin bosandy

ASTANA. 11 mamyr. Úndistannyń Harıana shtatynda 72 jastaǵy Daldjınjer Kaýr esimdi áıel adam alǵash ret ana atandy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Turmys qurǵanyna 46 jyl bolsa da, bala kótere almaǵan. Úmitin úzbegen 79 jastaǵy kúıeýi Mohınder Sıng Gılla ekeýi sońǵy eki jyl boıy atalǵan shtattaǵy klınıkalardyń birinde úzbeı em qabyldaǵan. France-Press agenttiginiń habarlaýynsha, otbasyndaǵy qýanyshty jaǵdaı 19 sáýir kúni bolǵan. Alaıda, bul málimet ótken seısenbide, ıaǵnı 10 mamyr kúni belgili boldy. «Jaratqan meniń úzbeı jasaǵan duǵalarymdy qabyl aldy. Endi men tolyqqandy otbasyda ómir súrip júrgenimdi sezinýdemin. Boıymdaǵy kúsh-qýatym áli qaıtqan joq, balamdy ózim baǵyp-qaǵamyn. Jubaıym da qamqor adam, maǵan barynsha kómek kórsetip júr. Sábıimizdiń esimin Armaan (Armaan) dep qoıdyq», – deıdi Daldjınjer Kaýr. National Fertility and Test Tube medısınalyq ortalyǵynyń habarlaýynsha, ol jasandy jolmen uryqtandyrý (Ekstrokorporaldyq uryqtandyrý) arqyly sábı kótergen. Aıta keteıik, bul Úndistanda bolǵan alǵashqy jaǵdaı emes. Osydan 8 jyl buryn, ıaǵnı 2008 jyly Ýttar-Pradesh shtatynyń turǵyny da 72 jasynda egiz balany bosanǵan. Aıan Ábdýálı. Derek: RIA «Novostı». Foto: inform.kz.