Arqa batyryn alaqanǵa saldy

Kenshiler astanasynda aıtýly oqıǵa boldy. Bul kúni K.Stanıslavskıı atyndaǵy orys drama teatrynda Memleket bas­shysynyń Jarlyǵymen áskerı boryshyn atqarý ústinde kór­setken erligi men janqııarlyǵy úshin «Halyq qaharmany» ataǵy berilgen Ulttyq ulan «Ortalyq» óńirlik qolbas­shy­ly­ǵynyń shtab bastyǵy – 6505 áskerı bólimi komandıriniń birinshi oryn­basary Qaırat Úmbetovke laıyqty qurmet kórsetildi. Qaharmanǵa qoshemet kórsetilgen saltanatty sharaǵa Qaraǵandy ob­ly­synyń ákimi, Ulttyq ulan men «Orta­lyq» óńirlik qolbasshylyǵynyń bas­­shy­lyǵy, áskerı bólimderdiń koman­dırleri, kúshtik qurylymdardyń jetekshileri, generaldar men sardarlar jáne sarbazdar qatysty. «Qazir menen «Mundaı joǵary nagrada alǵanda qandaı sezimdi bastan keshtiń?» dep jıi suraıdy. Birinshiden, ómirge joldama bergen, búgingi kúnde ózim qyzmet etip júrgen Ulttyq ulanǵa degen maqtanysh sezimi keýdeni kerneıdi. Bul – bizdiń brıgadanyń, óńirlik qolbas­­shylyqtyń, jalpy alǵanda, Qazaq­stan Respýblıkasy Ulttyq ulany áskerleriniń jeke quramynyń nagra­dasy!» – dep aǵynan jaryldy Qaırat Jarylqasynuly saltanatty sharada. Qatardaǵy jaýyngerdi ajaldan qutqaryp qalǵan Halyq qaharmanyn alǵashqy bolyp oblys ákimi Nur­muhambet Ábdibekov quttyqtady. «Bizdiń Otanymyzdyń eń joǵary bul nagradasy naǵyz batyrlarǵa ǵana tabys etiledi. Onyń ústine, bul erlik beıbit kúnde kórsetilip otyrǵan­dyǵy­men de qundy. Munyń ózi bizdiń jaýyn­gerlerdiń Otanymyzdy laıyqty qorǵaý úshin óz ómirlerin aıamaı, barlyq múmkindikti jasaýǵa ázir ekendikterin kórsetti», – dedi ol. О́ńir basshysy barsha qaraǵandylyqtar atynan beıbit zamannyń batyryna eki bólmeli páterdiń kiltin tabys etti. Budan keıin sahna tórine Uly Otan soǵysynyń jáne Qarýly Kúshter­diń ardageri, otstavkadaǵy polkov­nık Nıkolaı Pastýhov kóterilip, jas árip­te­sin joǵary nagradasymen quttyqtady. Qaırat ÁBILDINOV, «Egemen Qazaqstan» QARAǴANDY