Almatydaǵy alapat alaý

46 páterge úlken shyǵyn keltirdi Tań mezgilinde qalanyń qaq ortasynda eldi dúrliktirip, qyp-qyzyl otqa oranǵan jeti qabat turǵyn úı órt sóndirýshilerdiń jedel-qabyl qımylynyń arqasynda bir saǵatqa jeter-jetpes ýaqytta «tilsiz jaýdan» azat etildi. Abyroı bolǵanda, adam shyǵyny joq. Tútinge tunshyqqan jeti adam din-aman dalaǵa shyǵaryldy. Qatty ıis tıgen bir azamat aýrýhanaǵa jóneltildi. Tez arada qaýipsiz jerde qurylǵan «shatyrly qalashyqqa» 120 turǵyn jaıǵastyryldy. Araǵa kóp ýaqyt salmaı, oqıǵa ornyna asyǵys jetken qala ákimi Baýyrjan Baıbek zardap shegýshilermen kezdesip, hal-jaǵdaılaryna qanyqty. Abylaı han men Gogol kósheleriniń qıylysyndaǵy keńes zamanynan kópshilikke asa tanymal «Iýbıleınyı» gastronomy búginde sol ataýmen sýpermarket túrinde halyqqa úlgili qyzmet kórsetip keletin. Sol jyldary gastronomnyń buryshynda tushparasy taýsylmaıtyn «Qaragóz» kafesi bolýshy edi. Aıaq astynan aty joǵalǵan «Qaragózge» japsarlasyp keıinnen salynǵan «Korova bar» degen «tehastyq sıyrshylar» úlgisinde kafe jumys isteıtin. О́rt sol «sıyr baqqandar» dámhanasynan shyqty. Nysannyń saý-tamtyǵy qalmaı órtenip ketti. Bolǵan oqıǵamen jan-jaqty tanysqan qala ákimi Baýyrjan Baıbek «Dastarhan» jaýapkershiligi shekteýli seriktestiginiń basshylaryna taıaýdaǵy 7 kúnniń ishinde jalyn sharpyǵan barlyq 46 páterdi kúl-qoqystan tazartyp, qalpyna keltirýdi tabystady. Tıisti vedomstvo basshylarynan osy merzim ishinde páterlerdi gazben, sýmen, elektr jaryǵymen tolyq qamtamasyz etýdi mindettedi. Úsh merdiger mekeme bas­panalardy bastapqy qalpyna keltirý isine kirisip te ketti. Arnaýly komıssııa aýmaǵy 1100 sharshy metrdi sharpyǵan órtten kelgen shyǵynnyń aqyrǵy somasyn anyqtap ta qoıdy. Tergeý bastaldy. Tótenshe oqıǵanyń sabaq bolǵanyn eskere kelip, qala ákimi orynbasarlaryna qaladaǵy turǵyn úılerge japsarlasqan barlyq dámhanalyq, sháıhanalyq nysandardyń zańdylyǵy men jaılylyǵyn bir ret tekserip, súzgiden ótkizý kerektigin tapsyrdy. Talǵat SÚIINBAI, «Egemen Qazaqstan» ALMATY