Sýdaǵy qaýipsizdiktiń aldyn alý jumystary bastaldy

QOSTANAI. 13 mamyr. Qostanaı oblystyq tótenshe jaǵdaı departamentiniń mamandary sýdaǵy qaýipsizdik máseleleri jóninde brıfıng ótkizdi. Onda oblys óńirindegi sý aıdyndaryn tazalaý jáne jaǵajaılardy retke keltirý týraly aıtyldy. Bul týraly oblystyq tótenshe jaǵdaı departamentiniń baspasóz qyzmetine silteme jasaǵan egemen.kz tilshisi habarlady. Brıfıng jumysyna departamenttiń tótenshe jaǵdaılardyń aldyn alý bólimi bastyǵy azamattyq qorǵaý podpolkovnıgi O. Meńdibaeva, departamenttiń tótenshe jaǵdaılardy joıý bólimi bas mamany azamattyq qorǵaý podpolkovnıgi M. Levchenko jáne «Soltústik óńirlik aeroutqyr jedel qutqarý jasaǵy» bas qutqarýshysy J. Murzabekova qatysty. Olar Qostanaı oblysynyń sý aıdyndaryndaǵy qaýipsizdikti baqylaý jáne adamdardyń sýda qaza bolý sebepteri týraly aıtyp berdi. 2015 jyly oblysta 36 adam sýǵa ketken, onyń 4-i balalar. Al bıyl jyl basynan beri 3 adamnyń ajaly sýdan bolǵan. Onyń barlyǵyna negizgi jeke nemquraılylyq, ruqsat etilmegen jerlerde mas kúıinde shomylý, sondaı-aq, eresekter jaǵynan balalarǵa baqylaýdyń bolmaýy sebep bolǵan. Sýǵa shomylý maýsymy resmı túrde 1 maýsymda ashylady. Alaıda, oblystaǵy adamdar mamyr aıyndaǵy merekelerde-aq sý aıdyndarynda shomylýdy bastap ketti. Adamdar jaǵajaıǵa demalýǵa kelgende ishimdik ishedi, mas kúıinde sýǵa túsedi. Arnaıy jaǵajaılarda quramynda tórt adamnan qutqarýshy, medbıke bar qutqarý brıgadalary júredi. Alaıda, adamdar jabdyqtalmaǵan jerlerde, tereńdigi ári aǵysy belgisiz, qutqarýshylary joq jerlerde shomylýdy qyzyq kóredi. Brıfıngke qatysýshylar sý aıdyndarynyń mańynda demalatyn ýaqyttaryn ótkizetin eresekter ertip barǵan balalaryn qaraýsyz qaldyratynyna aıyryqsha toqtaldy. Ata-analar birinshi kezekte jabdyqtalmaǵan jerlerde shomylýǵa bolmaıtynyn, sý aıdyndarynyń mańynda qaýipsizdik erejelerin saqtamaý, qaıǵyly oqıǵalarǵa ákelýi múmkin ekeni balalarǵa túsindirý qajet. Departament ókilderi azamattarǵa mekemeniń resmı saıtynda Qazaqstan Resýblıkasynyń sý aıdyndaryndaǵy qaýipsizdik erejelerimen tanysý múmkindigi týraly eskertti. Saıttyń turǵyndarǵa arnalǵan saýalmama bóliminde sý aıdyndaryndaǵy qaýipsizdik erejeleri týraly saýalmana ornalastyrylǵan. Árkim onlaın rejıminde osy erejelerdi qanshalyqty biletini jaıly ózin-ózi tekserýden ótkize alady. Názıra Járimbetova. Derek, foto: Qostanaı oblystyq tótenshe jaǵdaılar departamentiniń baspasóz qyzmeti.