Senany sergitken sýretter

Jaqynda Lývr murajaıynyń alańynda, ataqty Pıramıdanyń astynda «Carrousel du Louvre» saýda-kórme galereıasynda buryn-sońdy bolyp kórmegen «Les Merveilles du Kazakhstan» (Qazaqstan ǵajaıyptary) fotokórmesi saltanatty túrde ashyldy. Tabıǵat syılaǵan ǵajaıyptardy da, adam qolymen jasalǵan ásemdikti de baǵalaı biletin fransýz astanasynyń turǵyndary mamyrdyń mamyrajaı kúnderinde qazaqtyń ushy-qıyry joq sheksiz jazırasyn, aıbyndy taý-shyń­­daryn, tostaǵanǵa quıǵandaı mól­diregen tap-taza kólderin, qyzdyń bu­rań belin­deı kóz tartqan ásem ózen­derin tamashalap, qazaqtyń tarıhy men qazirgi zamanǵy ozyq sáýletinen syr shertetin jáne halqymyzdyń baı mádenıeti men dástúrlerin kóz aldyńa ákeler keń pishimdi 26 (3 h 2,4 m) fotosýretter arqyly búgingi Qazaqstan kelbetimen tanysty. «Astana EKSPO-2017» UK» AQ-tyń qoldaýymen uıymdastyrylǵan kórmeniń ashylýyna Fransııa, Ispa­nııa, AQSh, Qytaı jáne basqa da elderdiń 30-dan asa BAQ ókilderi, son­daı-aq, fransýz týroperatorlary qatysyp, jýrnalıster EKSPO úshin tańdalǵan «Bolashaqtyń energııasy» taqyrybynyń ózektiligin atap ótti. Ashylý saltanatynda Qazaqstannyń Fransııadaǵy elshisi Nurlan Dánenov, «Carrousel du Louvre» dırektory Karo­lın Iop jáne Parıjdiń 1-okrýg merııasy qalalyq mádenıet komıtetiniń tóraǵasy Karla Arıgonı quttyqtaý sóz sóıledi. Jaqyn arada Qazaqstanǵa barýǵa úmit bildirgenniń biri Parıjdiń 1-okrýg merııasy qalalyq mádenıet komıtetiniń tóraǵasy Karla Arıgonı: «Bul peızajdar shyn máninde qyzyqty. Men tezirek ol jerge barǵym keledi», – dedi. Statıstıka boıynsha álemge áı­gili murajaıdyń kireberisteriniń biri bolyp tabylatyn «Carrousel du Louvre» galereıasy arqyly aı saıy­n jarty mıllıonnan astam adam ótedi eken. Osylaısha, qysqa merzim ishinde Qazaqstanǵa, Astanaǵa jáne EKSPO-2017 kórmesine kóptegen áleýetti týrıster nazar aýdaratyn bolady. 9 maýsymǵa deıin jalǵasatyn kór­mege kelýshiler #WelcomeToKZ vıktorınasyna belsendi túrde qaty­sýda. Jeńimpazǵa Astanada ótetin EKSPO-2017 halyq­aralyq maman­dandyrylǵan kórmesine qatysýmen birge, Qazaqstanǵa barý múmkindigi beriledi. Anar TО́LEÝHANQYZY, «Egemen Qazaqstan»