«Teńizde» jer qyrtysy terbeldi me?

Atyraýda «Teńiz» ataýy berilgen eń iri kenish bar. Onyń qoınaýy munaı men gaz qoryna toly bolǵanmen, óte tereńnen óndiriledi. Dál osy kenishtiń jerasty qyrtysynda 3,9 baldyq ter­belistiń tirkelgeni anyqtalyp otyr. Jerasty dúmpýi 8 mamyrǵa qaraǵan túnde bilingen. «Geofızıkalyq zertteýler ınstıtýty» RMK-niń jedel aqparatyna sáıkes, 2016 jylǵy 8 mamyrda Astana ýaqytymen 1 saǵat 27 mınýtta (7 mamyrda Grınvıch boıynsha 19 saǵat 27 mınýtta) epıortalyǵy Teńiz kenishiniń aýmaǵynda jer silkinisi tirkelgen. «Epıortalyq koordınattary: 45.99 gradýs soltústik endikte, 53.97 gradýs shyǵys boılyqta. Magnıtýdasy mb=3.9. Energetıkalyq synyby K=8.5» delingen habarlamada» dep jazady jergilikti «Aqjaıyq» gazeti. Jergilikti tabıǵat janashyry, akademık Muftah Dıarovtyń, so­ny­men birge, Qazaqstan Ulttyq ǵylym akademııasynyń seısmologııa ınstıtýtynyń málimetterine qara­ǵanda, Atyraý oblysynyń aýmaǵy, sondaı-aq, Kaspıı teńiziniń akvatorııasy da Rıhter baǵanymen 6 balǵa deıingi magnıtýdada jer silkinisi bolýy múmkin jer qyrtysy telimine kiredi. Buǵan Kaspıı teńizindegi «Qashaǵan», «Qaıran», «Aqtoty», «Korolevskoe» jáne «Teńiz» tuzasty kenishteri de jer qyrtysynyń tektonıkalyq belsendi telimderine ornalasqanyna nazar aýdarylady. Joldasbek ShО́PEǴUL, «Egemen Qazaqstan» ATYRAÝ