UBT-ny qaıta tapsyrý aqyly bolmaq

Keshe Prezıdent janyndaǵy Ortalyq kommýnıkasııalar qyzmetinde Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń tóraǵasy S.Nıýsýpov, Mektepke deıingi jáne orta bilim, aqparattyq tehnologııalar departamentiniń dırektory J.Jontaeva, Joǵary, joǵary oqý ornynan keıingi bilim jáne halyqaralyq yntymaqtastyq departamentiniń dırektory S.О́mirbaevtyń, «Nazarbaev zııatkerlik mektepteri» DBBU-nyń basqarma tóraıymy K.Shámshıdınova jáne Bilim jáne ǵylym mınıstrligi Ulttyq testileý ortalyǵynyń dırektory Q.Ábdıevtiń qatysýymen 2016 jylǵy UBT-ny ótkizýge daıyndyq týrasynda brıfıng bolyp ótti. UBT osy jyldyń 2-15 maý­sym aralyǵynda 166 arnaıy jabdyqtalǵan pýnktterde ót­kiziledi. Bul pýnktter aýdan or­ta­lyqtarynyń mektepterinde, 50-i oblystardyń, Astana jáne Almaty qalalarynyń joǵary oqý oryndarynyń ǵımarattarynda ornalasqan. Joǵaryda aıtylǵan barlyq 166 UBTО́P-te memlekettik komıssııa jumys isteıdi. Osy jyldyń aqpan aıynan bastap respýblıkanyń barlyq óńirinde BǴM aqparattandyrý-túsindirý jumystary úzdiksiz júrgizilip keledi. Qazirgi ýaqytta memlekettik komıssııa jergilikti atqarýshy organdarmen aqparattyq-túsindirý jáne 2016 jylǵy UBT ótkizýge daıyndyq boıynsha uıymdastyrý jumystaryn qyzý qolǵa alǵan. Bıylǵy mektep bitirýshiler sany 121 092 (onyń 83 330-y qazaq tilinde oqyǵandar, 37 762-si – orys tilinde). UBT-da 86 991 bitirýshi qatysady, 63 021-i qazaq tilinde, 23 970-i orys tilinde oqyǵan mektep túlekteri. Taǵy bir eskeretin jaıt, shekti 50 ball jınaı almaǵan bitirýshiler úshin 2016 jyldyń tamyz aıynda keshendi testileýdi qaıta tapsyrý múmkindigi berilgen. Biraq, qaıta tapsyrý aqyly, bar bolǵany – 2242 teńge jáne aqyly negizde oqýǵa ǵana quqyq beredi. Atalǵan shara joǵary oqý ornynda bilim alýǵa nıet bildirgen barlyq 86 991 bitirýshige joǵary bilim alýǵa úlken kómek. BǴM, jergilikti atqarýshy organdar jáne UBTО́P janyndaǵy memlekettik komıssııalar UBT-ny sátti ótkizý úshin qajetti jaǵdaı jasaýda. Jyl saıyn test tapsyrmalarynyń bazasy 20-30 paıyzǵa jańartylyp otyrady. Sondaı-aq, bul júıe boıynsha 1609 aýdıtorııany paıdalaný jos­parda tur. Mınıstrlik ókilderi retinde daıarlanǵan 1745 adam (bir aýdıtorııaǵa 1 adam) jiberiledi. Bıylǵy UBT formaty ózgerissiz qalpynda. 2015 jyldan bastap UBT-ny ótkizý qaǵıdalaryna UBT men pán boıynsha jyldyq baǵanyń qorytyndysyna sáıkes, ortasha arıfmetıkalyq quramdyq baǵa qoıylady. Daý týdyratyn jaǵdaı­da baǵany dóńgelekteý kótermeleý jaǵyna jasalady. Mundaı attes­tattaý mekteptiń jumysyn ádil baǵalaýǵa, mektep bitirýshilerge túsetin psıhoemosıonaldyq salmaqty azaıtýǵa múmkindik beredi. UBT ótkizý pýnktterinde rásimge qatysýshylardyń qaýipsizdigin qamtamasyz etý jáne UBT-ny obektıvti jáne aıqyn ótkizýge jaǵdaı jasaý maqsatynda 1399 uıaly telefon dybysyn basatyn, 438 metall izdegish, 275 beınetirkeýish jáne 2250 baqylaý kamerasyn qoıý josparlanyp otyr. UBT qorytyndysy mınıstr­lik­tiń, Ulttyq testileý ortaly­ǵy­nyń saıtynda jarııalanatyn bolady. Ol úshin JSN jáne testi­le­nýshiniń jeke kody (derbes qor­ǵa­nysh qoıylǵan) engizilse jet­kilikti. Aıta keteıik, Ulttyq biryńǵaı testileý (UBT) 2004 jyly engizildi. 12 jyl ishinde oǵan 1 mıllıon 504 myń mektep bitirýshileri qatysty, bul osy jyldardaǵy mektep bitirýshilerdiń jalpy sanynyń 77,1 paıyzyn quraıdy. Raýshan SÚLEIMENOVA