Álem tynyshtyqty qalaıdy

Keshe Astanadaǵy Ulttyq mýzeıde Memleket basshysy Nursultan Nazarbaevtyń «Álem. HHI ǵasyr» manıfesine arnalǵan «Qazaqstan: ult qaýipsizdigine tóngen jańa syn-qaterler» taqyrybynda dóńgelek ústel ótti. Elimizdiń jas tarıhshylary, ǵalymdar, saıasattanýshylar men áleýmettanýshylar jáne stýdentter qatysqan dóńgelek ústel barysynda «Álem. HHI ǵasyr» manıfesi keńinen talqylanyp, onyń turaqtylyq pen ornyqty damýdaǵy róli sóz boldy. Sondaı-aq, basqosýda ótken ǵasyrlardaǵy surapyl soǵystardyń áli kúnge tıgizip kele jatqan zardaptary týraly aıtyldy. Ulttyq mýzeıdiń «Qazaqstan tarıhy» bóliminiń jetekshisi Shynar Ýaısova óz kezeginde «Álem. HHI ǵasyr» manıfesiniń mán-mańyzyn aıta kelip, Qazaqstannyń ıadrolyq qaýipsizdik salasyndaǵy kóshbasshylyǵyn sóz etti. «Álem. HHI ǵasyr» manıfesi arqyly Elbasy Nursultan Nazarbaev jer betindegi beıbitshilikti saqtaıtyn qujat usynyp otyr. Qazaqstan – adamzat tarıhynda ıadrolyq qarýdan resmı bas tartqan alǵashqy memleket, Semeı polıgonyn japqan el. Iаdrolyq qarýdy jerde de, sýda da, aýada da paıdalanýǵa bolmaıdy. Elbasy manıfesi – tek ıadrolyq qarýǵa emes, jer betindegi kez kelgen soǵys túrine qarsy úndeý», – dedi Sh.Ýaısova. Dóńgelek ústelge qatysqan saıasattanýshy, fılologııa ǵylymdarynyń kandıdaty, saıasattaný doktory (PhD) Muhıt-Ardager Sydyqnazarov ótken ǵasyrlardaǵy surapyl soǵystardyń adamzatqa alyp kelgen aýyrtpalyǵy jóninde keńinen áńgimelep berdi. «Eger birinshi dúnıejúzilik soǵystaǵy, odan keıingi asharshylyq pen qýǵyn-súrgin jyldaryndaǵy, Uly Otan soǵysyndaǵy adam shyǵynyn eseptesek, jan aýyrady. Qazaqstan osynaý zulmatty jyldardy basynan ótkermegende qazir bizdiń halqymyzdyń sany 80 mıllıonǵa jetetin edi», – dedi spıker. Sondaı-aq, ol beıbit ómir barda, onyń qadiri bilinbeıtinin aıtyp ótti. Dóńgelek ústel sátinde tarıh ǵylymdarynyń doktory, Qazaqstan Bas redaktorlar klýbynyń múshesi Vıdadı Salahov, saıası sholýshy Damır Qasymov, Aýǵan soǵysy ardagerler keńesi tóraǵasynyń orynbasary Janat Baıjumanov jáne basqalar «Álem. HHI ǵasyr» manıfesi jóninde ózderiniń ornyqty pikirlerin jetkizdi. Olardyń sózderine qaraǵanda, álemdik ıadrolyq qaýipsizdikti nyǵaıtý turǵysyndaǵy Qazaqstannyń kótergen bastamalary álem jurtshylyǵy tarapynan qyzý qoldaý taýyp otyr. Budan bólek, olar manıfestiń BUU-nyń resmı qujaty retinde qabyldanǵanyna ekpin berdi. Joldybaı BAZAR, «Egemen Qazaqstan»