Jer reformasy jónindegi komıssııanyń alǵashqy otyrysy aıaqtaldy

ASTANA. 14 mamyr. Ulttyq mýzeıde ótken Jer reformasy jónindegi komıssııa otyrysynyń alǵashqy jumysy aıaqtaldy. Bul týraly egemen.kz tilshisi habarlady. Komıssııa otyrysynda tóraǵa, Premer-mınıstrdiń birinshi orynbasary Baqytjan Saǵyntaev búgingi Jer reformasy jónindegi jıynnyń alǵashqy jumysy aıaqtalǵanyn málimdedi. «Komıssııanyń kezekti otyrysy aldaǵy aptanyń senbisinde bolady. Kelesi jıynda jerdi satý máselesin qarastyramyz. Sondaı-aq, biz komıssııa múshelerin tórt topqa bólip, júıeli jumys jasaýdy bastaımyz. Eń aldymen atqaratyn jumysymyzdy baǵdarlap, naqty sheshimder qabyldap alaıyq. Sosyn óńirlerdi aralap, halyqpen kezdesýdi bastaımyz. Búgingi jıynnyń basynda túrli pikirler, qarama-qaıshy oılar, talas-tartys, túsinispeýshilikter oryn aldy. Degenmen, bárimizdiń tilegimiz de, júregimiz de aınalyp kelgende qazaqtyń qasıetti jerin qorǵaýǵa nıetti ekenimizdi ańǵartty. Bir birimizdi júrekpen túsindik. О́zimniń atymnan sizderge alǵys aıtamyn. Osyndaı otyrysqa arnaıy ýaqyttaryńyzdy bólip kelgenderińizge», – dedi komıssııa tóraǵasy Baqytjan Saǵyntaev. Sonymen qatar, tóraǵa alǵashqy otyrystyń sońynda qatysýshylardyń túıindi pikirin surap, usynystar berýdi aıtty. Jıyn sońynda sóz alǵan Aqparat jáne kommýnıkasııalar mınıstri Dáýren Abaev komıssııa otyrysyna 150-ge jýyq buqaralyq aqparat quraldarynyń ókilderi qatysqanyn jetkizdi. «О́zderińiz kórip otyrǵandaı osy jıyndy 150-ge jýyq aqparat quraldarynyń ókilderi baqylap, halyqqa ashyq ári shynaıy jetkizýde. Qazaqstandyqtar osydan-aq otyrystyń birjaqty emes ekenin, aýqymy keń ekenin ańǵaratyn bolady», – dedi mınıstr. Aıta keteıik, búgingi sharadan elimizdegi barlyq respýblıkalyq telearnalar men gazetterdiń jáne túrli saıttardyń jýrnalısteri jedel aqparat taratty. Talǵat Raıymbek. Derek, foto: egemen.kz.