Demokratııalyq partııadan AQSh prezıdenttigine úmitker Hılları Klınton saılaýda jeńiske jetken jaǵdaıda, óziniń jubaıy, eks-prezıdent Bıll Klıntonǵa «ekonomıkany tiriltýmen» aınalysýdy tapsyratynyn málimdedi.
«Ekonomıkany tiriltý jaýapkershiligin júktemek bolyp otyrǵan meniń jubaıym ony qalaı jasaıtynyn biledi», – dep aıtqan Hılları Klınton osy másele jóninde. Sondaı-aq, ol Bıll Klıntonnyń buǵan deıin kóńil bólinbegen, onyń ishinde AQSh-tyń shyǵysyndaǵy kómir óndirýshi aýdandardy ıgerýge onyń bilimi men biliktiligi erekshe paıda keltiretinin de atap ótken. Qazirgi kezde H.Klınton saılaýaldy básekede demokrattar arasynda kósh bastap keledi. Partııanyń aldaǵy sezinde ol 2239 delegattyń qoldaýyna ıe bolýy ábden múmkin. Al onyń prezıdenttikke kandıdattyqqa usynylýyna 2383 daýys qajet.
О́lim jazasyn engizýge ýáde berdi
Fılıppınniń jańa prezıdenti Rodrıga Dýterte el aýmaǵynda ólim jazasyn qoldanýdy qaıta engizýge jáne quqyq qorǵaý organdarynyń qyzmetkerlerine qylmyskerlerge qarsy oq atýǵa ruqsat bermek.
Buqaralyq aqparat quraldarynyń taratqan aqparattary boıynsha, bul – el basshysynyń rezonans týǵyzatyn kezekti bastamalarynyń biri. Buǵan deıin ol alkogol ónimderi men temeki shegýge tyıym salýǵa, sonymen qatar, balalar úshin tún mezgilinde komendanttyq saǵat engizýge jáne prezıdenttik saraıda aýrýhana ornalastyrýǵa sóz bergen eken. Bul el 2006 jyly qylmyskerlerdi ólim jazasyna kesýden jáne ony oryndaýdan bas tartqan edi. Prezıdenttiń aıtýynsha, ol parlamentten jazalaýdyń eń qatal túri retinde ólim jazasyn qaıta qalpyna keltirýdi suramaq. Al qylmys jasaǵandar qamaýǵa alar kezde jáne uıymdasqan qylmyspen baılanystaǵylardy ustaǵan kezde, olar qarsylyq kórsetse, quqyq qorǵaý organdary qyzmetkerleri qarý qoldana alady.
Brıtanııa EO-dan shyqqan jaǵdaıda...
Ulybrıtanııa Eýropalyq odaqtan shyqqan jaǵdaıda, el aýmaǵynan úsh mıllıon eýropalyq shyǵarylýy múmkin ekendigin Koroldiktiń ishki ister mınıstrligi habarlady.
Lordtar palatasy ókilderiniń mınıstrler kabınetine mynadaı maǵynada suraq berilgen: «Ulybrıtanııa Eýropalyq odaqtan shyqqan jaǵdaıda, siz Koroldik aýmaǵynda ornyǵyp qalǵan Eýroodaqqa múshe elderdiń azamattarynyń osynda tura berýine nıettisiz be?». Buǵan Shotlandııanyń bas prokýrory Rıchard Kın jaýap qaıtarypty. «Eger Ulybrıtanııa Eýropalyq odaq quramynan shyǵýǵa daýys berse, úkimet elde pozıtıvti jaǵdaıdy saqtaý úshin bar múmkindikti jasaıdy, – degen ol. – Biraq, Eýroodaq zańy boıynsha, ondaı azamattardyń quqyǵyna kepildik berilmeıdi». О́tken jyldyń mamyrynda Ulybrıtanııanyń premer-mınıstri Devıd Kemeron 2017 jyldyń sońyna deıin Birikken Koroldiktiń Eýroodaqqa músheligi máselesi jóninde referendým ótkizýge ýáde bergen edi.
Qysqa qaıyryp aıtqanda:
Izraıldiń premer-mınıstri Benıamın Netanıahý Fransııanyń palestıkalyqtarmen beıbit kelissózdi qaıta jalǵastyrý týraly bastamasyn qoldamady. Onyń málimdeýinshe, kelisimge kelýdiń eń basty joly – aldyn ala talaptar qoımaı, beıbit kelissóz júrgizý.
Keshe Venada Armenııa prezıdenti S.Sargsıan men Ázerbaıjan prezıdenti I.Alıev kezdesip, taraptar Taýly Qarabaq máselesin talqylady. Oǵan AQSh, Reseı jáne Fransııa ókilderi qatysty.
Osy jyldyń jaz maýsymynda AQSh, Ońtústik Koreıa jáne Japonııanyń áskerı-teńiz kúshteri alǵash ret birlesken zymyranǵa qarsy oqýlaryn ótkizedi. Ol Gavaı araldary aýmaǵynda ótedi.
Qytaı astanasy – Beıjińde Zıka vırýsy bezgegimen aýrýdyń alǵashqy oqıǵasy tirkeldi. Qytaılyq áıel aýrýdy Venesýeladan juqtyryp kelgeni anyqtalǵan.
Otyzdan astam kýrsant ajal qushty
Iemenniń ońtústigindegi Mýkalla portynda jankeshtiniń ózin-ózi jaryp jiberýi saldarynan 30-dan astam polısııa kýrsanty ajal qushty. Bul aqparatty «Bı-bı-sı» taratty.
Jergilikti dárigerlerdiń aıtýyna qaraǵanda, osy terrorlyq áreketten keminde 60 adam jaralanǵan. Al jarylys sáýir aıynda qaıtadan úkimettik áskerlerdiń qolyna ótken Mýkalla portynyń shetkeri jaǵynda bolǵan. Resmı adamdardyń habardar etýinshe, budan basqa taǵy bir jarylys jasalǵan. Shabýyl jasaýshylar jergilikti qaýipsizdik qyzmetiniń basshysyn óltirmek bolypty. Bir jaqsysy, ol tiri qalǵan, ókinishtisi – onyń alty kúzetshisi qaza tapqan. Shabýyl Iemen úkimeti men kóterilisshi hýsıtter arasynda kelissózderdiń júrgizilip jatqan kezinde jasalyp otyr. Bul eldegi áskerı qaqtyǵys bir jyldan astam ýaqyttan beri toqtamaı keledi.
Qaýipsizdik jolyndaǵy qadam
Aqparat agenttikteriniń habarlaýynsha, Saýd Arabııasynyń ishki ister mınıstrligi Mekke provınsııasynda Taıaý Shyǵystaǵy eń iri zamanaýı komandalyq qaýipsizdik ortalyǵyn iske qosýǵa daıyndalyp jatyr.
Qazirgi kezde joldardaǵy qaýipsizdik ortalyǵy istep tur. Bul ortalyqty 2015 jyly murager hanzada Muhammed bın Naıf, sondaı-aq, Koroldiktiń vıse-premeri men ishki ister mınıstri iske qosqan eken. Eldiń ishki ister mınıstrligi birlesken qaýipsizdik sharalarynyń ulttyq ortalyǵyn basqaratyn jáne onda jumys isteıtin 1600-den astam ofıser men qatardaǵy jaýyngerdi ázirlikten ótkizip te qoıypty. Ortalyq qyzmetkerleri aǵylshyn tilin meńgergen, sol úshin sheteldegi arnaıy oqýlardan ótipti. Ortalyqtyń eń basty ereksheligi – onda 18 myń baqylaý kamerasynyń bolýy. Bul sharalar qajylyq kezinde adamdardyń qaýipsizdigin qamtamasyz etý maqsatynda jasalyp otyr.
Tergeý aqıqat úshin qajet
Tájikstannyń syrtqy ister mınıstrligi Reseıden Máskeýdegi Hovansk zıratynda bolǵan tóbelesti burmalamaı, aqıqat turǵysynda tergeýdi talap etti. Osy tóbeles kezinde Tájikstannyń úsh azamaty ajal qushqan edi.
Tájikstan syrtqy ister mınıstrliginiń Reseıdiń osy eldegi elshisine tabys etken habarlamasynda «bolǵan oqıǵaǵa naqty tergeý júrgizýdi jáne oǵan kinálilerdi qatań jaýapkershilikke tartýdy» talap etken. Aıta keteıik, Hovansk zıratyndaǵy tóbeles 14 mamyrda oryn aldy. Oǵan kúrekpen, armatýra kesindilerimen, sondaı-aq, atys qarýlarymen qarýlanǵan 200-ge jýyq adam qatysqan. Tóbeles kezinde Tájikstan azamattary – S.Hýshakov, I.Rızove jáne S.Sobırov qaza taýyp jáne tórt adam aýyr jaǵdaıda aýrýhanaǵa jetkizildi. Qazirgi kezde adam ólimine soqtyrǵan osy oqıǵaǵa qatysty tergeý amaldary júrgizilýde.
Internet materıaldary negizinde ázirlendi