Qazaqstanda turaqty turýǵa jáne jumys isteýge nıetti sheteldik azamattar úshin qarastyrylǵan suranysqa ıe mamandyqtar tizimi osy jyldyń sońyna deıin qaıta qaralady. Bul týraly Premer-Mınıstrdiń orynbasary – Mádenıet jáne aqparat mınıstri Aıda Balaeva málimdedi. Bul qadam elimizdiń ekonomıkalyq qajettilikterin eskere otyryp, joǵary bilikti kadrlardy tartýǵa baǵyttalǵan, dep habarlaıdy Egemen.kz.
Mınıstr óz sózinde 2026 jylǵy 10 sáýirden bastap shetel azamattaryn turaqty turýǵa qabyldaýdy retteıtin qosymsha sharalar engizilgenin atap ótti. Qazaqstan ınvestorlar men suranysqa ıe mamandyq ıeleri úshin jeńildetilgen tártipti saqtap otyr.
Investısııalyq jobalardyń basshylary men qatysýshylaryna, sondaı-aq olardyń otbasy múshelerine «A-5» jáne «A-6» sanatyndaǵy vızalar beriledi. Bul ınvestorlardyń Qazaqstan ekonomıkasyna erkin kelip, bıznesti damytýyna jáne jańa jumys oryndaryn ashýyna jol ashady.
Smart Grid men JI-ınjenerleri: Elimizde jańa mamandyqtar paıda bolady
Qazirgi tańda tizimge 51 mamandyq engen. Olardyń qatarynda neırohırýrgter, gematologter, farmasevtıka ónerkásibiniń ınjener-tehnologteri, bakterıologtar men grafıkalyq anımasııa tehnıkteri bar.
Kóshi-qon saıasaty tujyrymdamasyn 2030 jylǵa deıin iske asyrý aıasynda mamandar tizimin jańartý jumystary júrgizilip jatyr.
«Bul tizim ekonomıkanyń suranysyna qaraı turaqty túrde jańartylyp otyrady. Jańartý jumystary osy jyldyń sońyna deıin aıaqtalady. Bul tásil elimizdiń ekonomıkasyndaǵy ózgeristerge der kezinde jaýap berýge jáne naqty qajetti mamandardy tartýǵa múmkindik beredi», dedi Aıda Balaeva.
Mınıstrdiń aıtýynsha, Qazaqstan joǵary bilikti mamandar úshin jańa vıza formattaryn engizip jatyr. Bul qadam elimizge álemge tanymal talanttardy, ozyq bilim men zamanaýı tehnologııalardy ákelýge múmkindik beredi. Nátıjesinde ınvestısııa kólemi artyp, kadr tapshylyǵy azaıady dep kútiledi.
2035 jylǵa qaraı qandaı mamandyqtar suranysqa ıe bolady?
Sonymen qatar sheteldik azamattar salalyq memlekettik organdardyń ótinish haty arqyly da Qazaqstanǵa jeńildetilgen tártippen kele alady.