ASTANA. 2 maýsym. Qazaqstan Prezıdenti janyndaǵy Memlekettik basqarý akademııasyna Ulybrıtanııa elinen lord Frensıs Mod keldi. Bul týraly Memlekettik basqarý akademııasynyń baspasóz qyzmetine silteme jasaǵan egemen.kz tilshisi habarlady.
Prezıdent janyndaǵy Memlekettik basqarý akademııasynyń rektory Bolatbek Ábdirasılov lord Frensıs Modty qabyldady. Kezdesý barysynda Frensıs Ulybrıtanııanyń mınıstrler kabınetinde memlekettik qyzmettiń damýyna jaýapty bolǵanyn jáne osy salada birqatar reformalar jóninde bastama kótergenin, sonymen birge memlekettik basqarý júıesine ınnovasııalardy engizýmen aınalysqanyn aıtty. Nátıjesinde memlekettik jobalar men baǵdarlamalardyń aýdıt júıesi engizilip, iri jobalardy basqarý jónindegi arnaıy agenttik qurylǵan.
Búginde onyń basshylyǵymen kóshbasshylyq akademııasy ashylǵan jáne Oksford ýnıversıtetiniń Saıd bıznes-mektebimen birlesip memlekettik organdardyń basshylaryn jobalyq basqarý boıynsha oqytý úshin arnaıy oqý baǵdarlamalaryn ázirlegen. Bul Ulybrıtanııada ıkemdi jobalyq basqarý qaǵıdattary men olardy baǵalaý júıesin qysqa merzim ishinde engizýge múmkindik berdi. Sonymen qatar, jobalardy iske asyrý tıimdiligin tekserý nátıjeleri týraly esepterdi turaqty túrde jarııalaý engizilip, azamattardyń memleketke degen senim deńgeıin arttyrýǵa yqpal etti. Osylaısha, ulttyq jobalardy basqarý bóliginde, úkimettiń ashyqtyq jáne aıqyndyq qaǵıdattary is júzine asyryldy.
Rektor Bolatbek Ábdirasılov akademııadaǵy oqý prosesin jańǵyrtý, memlekettik qyzmetshilerdi oqytýda ınnovasııalyq tásilderdi engizý, Qazaqstannyń memlekettik basqarý júıesine ınnovasııalyq tásilderdi engizý boıynsha jańa bastamalar ázirleý barysy týraly jáne Ulybrıtanııanyń memlekettik organdarymen, oqý oryndarymen, sondaı-aq, brıtandyq memlekettik basqarý júıesine jobalyq menedjmentti engizýmen aınalysqan kompanııalar tóńireginde ózara is-qımyl tájirıbesin baıandady.
Kezdesý sońynda lord Mod akademııanyń qyzmetine joǵary baǵa berdi jáne ekijaqty yntymaqtastyqty damytýǵa, onyń ishinde Qazaqstannyń memlekettik organdarynyń basshylaryna arnalǵan jobalyq menedjment boıynsha semınarlar sıklin uıymdastyrýǵa qyzyǵýshylyq tanytty.
Talǵat Raıymbek.
Derek: Prezıdent janyndaǵy Memlekettik basqarý akademııasynyń baspasóz qyzmeti.
Foto: inform.kz.