Qazaq sahnasyndaǵy fransýz týyndysy

Sahnada – jalǵyz áıel. Onyń kózge kórinbeıtin súıiktisimen telefon arqyly tildesýi – syrttaı qaraǵanda qarapaıym dıalog. Alaıda sol dıalogtiń astarynda kúırep bara jatqan taǵdyr, úzilip bara jatqan úmit, sońǵy ret tirshilikke jarmasqan sezim bar.

Qoıylymnyń basty ereksheligi – Jan Koktonyń pesasy negizinde jazylǵan HH ǵasyrdaǵy opera óneriniń jaýhary jalǵyz keıipkerdiń taǵdyry men ishki arpalysy arqyly saraptalýynda. Bir keıipkerdiń sezim álemin asha otyryp, týyn­dy kórermenge jalǵyzdyq, mahabbat, úmit pen qoshtasý sııaqty tereń emosııalyq kúılerdi sezindiredi.

Atalǵan týyndy buǵan deıin birneshe álem tilinde sahnalanyp, ár halyqtyń kórkemdik qabyldaýyna saı jańasha boıaý tapqan edi. Atap aıtsaq, aǵylshyn, ıtalııa, orys, ıspan, japon, káris, ýkraın, tipti ym-ıshara tilinde sahnalansa, endi sol tizimge qazaq tili qosyldy. Pesa 2023 jyly M. Áýezov atyndaǵy Qazaq ulttyq drama teatry sahnasynda «Daýys» ataýymen qoıylyp, kópshiliktiń ystyq yqylasyna bó­lengen bolatyn. Aýdarmasyn qazaq óneriniń kórnekti ókili Tuńǵyshbaı Jamanqulov jasap, rejısser Barzý Abdýrazakov sahnalady. Al bul joly shyǵarma monoopera janrynda jańa qyrynan usynylyp, sóz ben áýen tutas psıhologııalyq qoıylymǵa aınaldy. Spektakl rejısseri Farhat Moldaǵalıdiń kórkemdik sheshiminde artyq pafos joq, mınımalıstik keńistik pen jaryqtyń dál qoıylymy arqyly keıipkerdiń ishki álemi aldyńǵy qatarǵa shyqqan.

Sahnadaǵy dramalyq obrazdy Qazaqstannyń eńbek sińirgen qaıratkeri Dárııa Júsip somdady. Bir saǵatqa jýyq sahnada jalǵyz qalyp, keıipkerdiń jan álemin tek daýys pen ishki kúı arqyly jetkizý – úlken sheberlik pen rýhanı tereńdikti talap etedi. Ánshiniń oryndaýyn­da názik sybyr da, úmitke toly jalyn da, sharasyzdyqqa ulasqan únsizdik te tabıǵı úılesim tapty. Kúrdeli vokaldyq partııany daıyndaýǵa belgili ustaz, ánshi Galına Qaramoldaeva atsalysty. Al operany dırıjer Qanat Omarov basqarǵan T.Ábdirashev atyndaǵy Memlekettik akademııalyq sımfonııalyq orkestri súıemeldedi.