DÚBIR. Olımpıadalyq bólim

Olımpıadanyń bastalýyna 62 kún qaldy Jigitter júldesiz bolmaıtyndaryna senimdi Kún sanap Olımpııalyq oıyndar ótetin ýaqyt jaqyndap keledi. Endi eki aıdan sál ǵana artyq merzim ishinde Rıo-de-Janeırodaǵy «Marakana» stadıonynda alamannyń alaýy lap etip tutanyp, tórt jylda bir aınalyp keletin jahandyq jarystyń bastalǵanyn jarııa etedi. Mezgili taıaǵan saıyn dúnıejúzilik dúbirge dúbir qosatyn sańlaqtar sany artyp, esimderi aıqyndala túsýde. Osy qatardaǵy Qazaqstan sportshylary qazirge deıin 88 lısenzııa alyp úlgerdi. Oıyndar ótetin shaq jaqyndaǵan saıyn onyń tóńiregindegi áńgimeler de kúsheıip keledi. Dálirek aıtqanda, Rıoda buǵan jaqsy jaǵdaı jasalatynyna kúmán keltirýshiler kóp. Eń basty qaýip, bul elde zıka naýqasynyń kóbirek tarap ketkeni bolyp otyr. Osyǵan baılanysty qaýipke qater ulastyryp jatqandar da bar. Al biz báriniń sátti ótetinine sengimiz keledi. Aýyr atletter báıgege kimdi qosady? Aýyr atletıkadan búgingi kún­niń basty suraǵy osy bolyp tur. Al ony sheshetin basty jarys keshe Taldyqorǵan qalasyndaǵy jastar sport saraıynda bastaldy. Maýsymnyń 3-nen 7-ne deıingi aralyqta jalaý jelbiretetin Qazaqstan chempıonaty komanda úshin berilip otyrǵan 10 lısenzııany kimderdiń alatynyn anyqtaıdy. Birinshilikke qatysý úshin mun­­da respýblıkanyń túkpir-túk­pi­rinen eki júzden astam atlet kelip otyr. Osy básekeniń qo­ry­­­tyndysymen Qazaqstan olım­­pııalyq quramasynyń sapy qu­ralady. Jarystar kún saıyn tańerteńgi 11-de bastalady. Olar­dyń barysynan «Qazaqstan» jáne «Kazsport» telearnalary tike­leı efır­de reportajdar júrgizip turady. Qazaqstan boksshylary medal úshin kúresedi Qazaqstan boksshylary Rıo-de-Janeıro rınginde medal alý úshin shaıqasatyn bolady. Olardyń keminde bir júlde alyp qaıtýǵa tolyq múmkindikteri bar. «Astana Arlans» kásipqoılar komandasynyń bas jattyqtyrýshysy Nurlan Aqúr­pekov osyndaı boljam aıtady. – Bizdiń komandanyń úsh júldeni de alýǵa tolyq múmkindikteri bar. Men olardyń qaı túriniń de kóbirek bolǵanyn qalaımyn. Sonyń ishinde, altyn júldesiz qalmaýymyz kerek, – dedi ol. Jattyqtyrýshy qurama sapyn­daǵy jigitterdiń bári tájirıbeli ekenin, aldaǵy alaman jarysta qaı-qaısysynyń da joǵary bıikten kórine alatynyn atap ótti. Aıta ketetin jaıt, Qazaqstan­nyń boksshylar quramasy osy Olımpıadada birinshi ret tolyq qura­mymen óner kórsetkeli otyr. Olar elimizdiń bas komandasy úshin basy 1996 jyldan arna tartatyn Oıyndardyń barlyǵynan da medal alyp oraldy. Sonyń ishinde altyn medalsiz qaıtqan Olımpııalyq oıyndarymyz da bolǵan joq. Bul joly Rıoda elimizdiń namysyn  Birjan Jaqypov, Oljas Sáttibaev, Qaırat Erálıev, Berik Ábdirahmanov,  Abylaıhan Júsipov, Danııar Eleýsinov, Jánibek Álimhanuly, Ádilbek Nııazymbetov, Vasılıı Levıt jáne Ivan Dychko qorǵaǵaly otyr. Olardyń qaı-qaısysy da joǵary jetistikke jete alady. Reseı Oıyndarǵa jeńil atlet­tersiz barýy múmkin Reseı jeńil atletıka quramasy­nyń Rıo-de-Janeıroǵa bara almaı qalý qaýpi tónip tur. Halyqaralyq jeńil atletıka federasııalary assosıasııasynyń (IAAF) úsh múshesi jaqynda osynda boljam bildirdi. Buǵan assosıasııanyń 2015 jylǵy 13 qarashada tyıym salynǵan preparattardy paıda­lanýǵa jol berip qoıǵany úshin Búkilreseılik jeńil atletıka asso­sıasııasyn óziniń qatarynan shy­ǵa­ryp tastaǵany negizgi sebep bolǵaly tur. Reseılikterge alda paıdalanyp qalýdy kerek etetin bir ǵana múmkindik bar. Ol – IAAF-tyń 17 maýsym kúni ótetin keńes otyrysy. Eger osy jıynda Búkilreseılik jeńil atletıka assosıasııasy óziniń quqyqtaryn qalpyna kel­tirip, qaı­tadan halyqaralyq qaýym­dastyqqa múshe bolyp kire alsa, Reseı jeńil atletteriniń Oıyndarǵa qatysýǵa joldary ashylady. Al buǵan qol jetpese, sportshylar amalsyz qa­lyp qoıady. Bıylǵy jylǵy 14 sáýir kúni ót­ken tikeleı efır habary kezinde Reseı prezıdenti Vladımır Pýtın eldiń jeńil atletıka ulttyq qura­masynyń bas jattyqtyrýshysy Iýrıı Borzakovskııge komandany Oıyndarǵa daıyndaý jóninde tapsyrma berdi. Memleket basshysy sondaı-aq, sport mınıstrliginiń Reseı sportshylarynyń quqyqtary úshin kúresýdi jalǵastyratynyn atap ótken edi. Zıka vırýsy jurtty áli qat­ty úreılendirip otyr Álemdi jaılap bara jatqan zıka vırýsynyń bir oshaǵy Brazı­lııa ekeni, mundaǵy ahýaldyń áli de qaýipti kúıinde qalyp tur­ǵa­ny Olım­pıada qarsańynda jurt­shy­lyqty úreılendire bas­tady. Munyń sońy medısına salasyndaǵy 150 sarapshynyń zıka vırýsyna baılanysty Olımpııalyq oıyndardy basqa qalaǵa aýystyrý jóninde hat jazýǵa ulasty. Dárigerler málimdemelerin Dúnıe­júzilik densaýlyq uıymy­nyń bas dırektory Margaret Chen­niń atyna joldaǵan. Ǵalymdar jahandyq jarysty bıyl toqtatyp tastaýǵa shaqyryp otyrǵan joq. Biraq dodany Rıoda qaldyrýǵa bolmaıtynyn aıtady. Olar tek Brazılııada Oıyndar ótip jatsa, bir mezgilde 500 myń sheteldik týrısterdiń zıka dertin juqtyryp, óz elderine alyp ketetinin aıtyp saqtandyrady. Eger bul kesel Afrıka men Ońtústik Azııanyń kedeı elderine tarap jatsa, ahýaldyń kúrt nasharlap ketetinin atap ótedi. «Oıyndar úshin táýekelge barý adam­gershilikke jatpaıdy», – dep jazady hat avtorlary. Sarapshylar Rıo-de-Janeı­ronyń atalmysh indettiń kóbirek taraý yqtımaldylyǵy joǵary ekinshi qalasy ekenine de nazar aýdarady. Bul qaladaǵy densaýlyq saqtaý júıesi nashar. Al zıka basylýdyń ornyna basynyp barady, dep atap kórsetedi hat jazýshylar. Osyǵan oraı Dúnıejúzilik densaýlyq saqtaý uıymynan bul máseleni taldap sheshetin táýelsiz konsýltasııalyq top qurýdy usy­nady. Aıta keteıik, zıka aýrýy Aedes tekti masanyń shaǵýynan taraıdy. Ony juqtyrǵan adamnyń ystyǵy kóterilip, denesi qyshıdy, basy aýy­ryp, býyndary isip ketedi. Serik PIRNAZAR, «Egemen Qazaqstan»