2 naýryzda barlyq aımaqtardaǵy jergilikti áskerı atqarý organdarynda Qazaqstan Respýblıkasynyń Memlekettik kúzet qyzmeti qataryndaǵy merzimdi áskerı qyzmetke úmitkerler irikteledi. Irikteý 10 sáýirge deıin júredi, dep habarlaıdy Egemen.kz.
Memlekettik kúzet qyzmeti sarbazdary qataryna elimizdiń 18 ben 27 jas aralyǵyndaǵy, boıy 180 sm-den joǵary jáne 195 sm-den aspaıtyn, bilimi orta, orta arnaýly jáne joǵary, densaýlyǵy jaqsy kez kelgen azamaty qosyla alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Irikteýden ótken sarbazdar áskerı boryshyn Astana jáne Almaty qalalaryndaǵy «Aıbyn» jáne «Batyr» prezıdenttik polkterinde atqarady. Olar tájirıbeli nusqaýshylyq quramnyń jetekshiligimen áskerı iske úırenedi, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.
Qazaq áskerıleri Golan jotalaryna attanady
Memlekettik kúzet qyzmeti merzimdi qyzmet sarbazdary Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarady.
1 naýryzdan bastap kóktemgi áskerge shaqyrý bastalady
Merzimdi áskerı qyzmetti Memlekettik kúzet qyzmeti qatarynda atqarý jas azamattar úshin myqty erlik mektebi bolady, olar munda óziniń ómirlik jolyna qajetti mańyzdy daǵdylarǵa úırenedi. Jastar úshin bul kezeń ary qaraıǵy mansap jolyn jalǵastyrýǵa negiz, áleýmettik lıft bolýy múmkin. Merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alady, odan ári olardyń arnaýly memlekettik organnyń qyzmetkeri jáne ofıseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar.
Sıfrlyq múmkindik – ásker áleýetiniń ózegi
Sonymen qatar QR MKQ merzimdi qyzmet sarbazdary úshin merzimdi áskerı qyzmet atqarǵan azamattardy áleýmettik qoldaý boıynsha Qazaqstan Respýblıkasynda belgilengen barlyq jeńildikter qoldanylady.