Keshe Investısııalar jáne damý mınıstrligi Memlekettik qyzmet isteri vedomstvosynyń Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Alık Shpekbaevtyń qatysýymen beınekonferensııa rejimindegi keńeıtilgen keńes ótkizdi. Atalǵan sharaǵa elimizdiń on tórt oblysy men Almaty qalasyndaǵy tıisti organdar tikeleı rejimde qosyldy.
Otyrysta elimizdiń ınvestısııa jáne damý salasyndaǵy sybaılas jemqorlyqtyń aldyn alý jáne sybaılas jemqorlyqqa qarsy saıasat júrgizý máselesi talqyǵa tústi. 2015-2025 jyldarǵa arnalǵan sybaılas jemqorlyqqa qarsy kúres strategııasy Elbasynyń «Qazaqstan-2050» Strategııasyndaǵy alǵa qoıǵan mindetterin is júzinde júzege asyrýǵa baǵyttalǵan. Eń basty mindet – qoǵamda sybaılastyqqa tózbeýshilik orta qalyptastyrý, azamattardyń quqyqtyq sana-sezimin arttyrý, bızneste ózara senimge qurylǵan jaýapkershilik pen áriptestik negizde atalǵan áleýmettik keselmen kúresý. Bul maqsatta Investısııalar jáne damý mınıstrligi tarapynan 2015-2017 jyldarǵa arnalǵan sybaılas jemqorlyqpen kúres sharalary qarastyrylǵan. Onda memlekettik qyzmet kórsetý sapasyn arttyrý, elektrondy formattaǵy ruqsat qujattaryn berý jaıyn ońaılatý, kóleńkeli ekonomıkamen kúres sııaqty mańyzdy mindetter qamtylyp otyr. Bul rette 2015 jyly mınıstrlik tarapynan korrýpsııaǵa qarsy kúres keńesi qurylǵandyǵyn qaperge sala ketken jón. Vedomstvolar men óńirlerdegi sybaılastyqqa qatysty derekter boıynsha 2015 jyly sybaılas jemqorlyq qylmysy úshin 21 qyzmetker, al 2016 jyldyń bes aıy ishinde qylmystyq jazaǵa 7 adam tartylǵan. Munyń barlyǵy baqylaýshy organ men shaǵyn bıznes sýbektileri arasyndaǵy tikeleı baılanystan osyndaı sybaılas jemqorlyq áreketteriniń týyndaıtyndyǵy belgili boldy. Sondyqtan da, barlyǵyn avtomattandyrý, naqty baqylaý ornatý men ýaqyt belgileý máseleleri jan jaqty talqyǵa tústi.
«Egemen-aqparat»