Astana qalasynda ótken Álemdik jáne dástúrli dinder lıderleri sezi Hatshylyǵynyń jumys tobynyń kezekti otyrysy aıasynda Qazaqstannyń jetekshi dinı birlestikteriniń basshylarynyń ekstremızm men terrorızmge qarsy is-qımyl máseleleri jónindegi úndeýge qol qoıý rásimi ótti.
Úndeýge Qazaqstan musylmandary dinı basqarmasynyń, Qazaqstan pravoslavıe shirkeýiniń, Rım-katolık shirkeýiniń jáne Qazaqstannyń ıýdeı qaýymdastyǵynyń basshylary qatysty.
Qabyldanǵan úndeýde ekstremızm men terrorızm ıdeologııasyna qarsy turýǵa, qoǵamdyq turaqtylyqty saqtaýǵa, sonymen qatar, Qazaqstannyń ósip-órkendeýi jolyndaǵy etnosaralyq jáne konfessııaaralyq kelisimdi odan ári nyǵaıtýǵa jumyldyrylǵan birlesken kúsh-jigerdiń mańyzdylyǵy atap kórsetilgen.
«Biz, Qazaqstannyń jetekshi dinı birlestikteriniń basshylary men ókilderi, Qazaqstan Respýblıkasy Prezıdentiniń bastamalaryna qoldaý bildire otyryp, ekstremızm men terrorızmniń kez kelgen kórinisteri men túrlerin úzildi-kesildi qabyldamaımyz, zorlyq-zombylyqtyń kez kelgen túrin dinı turǵydan aqtaý áreketterin aıyptaımyz. Din men ekstremızmniń úılespeıtinin málimdeımiz, jazyqsyz adamdardyń ólimine ákelip soǵatyn álemniń túrli aımaqtarynda oryn alyp jatqan qatygez terrorıstik áreketterge úlken alańdaýshylyq bildiremiz», delingen úndeýde.
«Egemen-aqparat»