ASTANA. 6 maýsym. Búgin Bas prokýratýranyń ókilderi Ońtústik Qazaqstan oblysyndaǵy «Shymkent pıvo» seriktestiginiń bas dırektory Toqtar Tóleshovke qatysty qylmystyq istiń tergelý barysy jaıynda brıfıng ótkizdi. Bul týraly Bas prokýratýranyń baspasóz qyzmetine silteme jasaǵan egemen.kz tilshisi habarlady.
Brıfıngte Bas prokýratýranyń departament bastyǵy Qusaıyn Igembaev pen Ulttyq qaýipsizdik komıteti baspasóz qyzmetiniń ókili Rýslan Karasıov atalǵan qylmystyń istiń tergelý barysyn habarlady.
«Arnaıy prokýrordyń basshylyǵymen vedomstvoaralyq tergeý toby transulttyq qylmystyq topty qarjylandyrý, uıymdasqan qylmystyq topty basqarý, zańsyz esirtki zattaryn saqtaýǵa kúdikti retinde «Shymkent pıvo» seriktestiginiń bas dırektory Toqtar Tóleshevke jáne onyń aınalasyndaǵy birneshe adamǵa qatysty qylmystyq isterdi tergeýde. Búginde Tóleshevke aýyr jáne asa aýyr qylmystar, sonyń ishinde adam urlaýdy jáne óltirýdi uıymdastyrý, túrli dárejedegi dene jaraqatyn keltirý, bótenniń múlkin qasaqana joıý, reıderlik tárizdi qylmystar boıynsha aıyp taǵylýda», – dedi Bas prokýratýranyń departament basshysy Qusaıyn Igembaev. Sonymen qatar, prokýror atalǵan qylmystyń bóligin Ulttyq qaýipsizdik komıteti júrgizip jatqanyn aıtty.
«Tergeý organdary Tóleshovtiń buryn bılikti basyp alýǵa daıyndyq jumystaryn júrgizgeni, al ótken jyldan bastap naqty qadamdar qabyldaǵany týraly tolyq málimetterdi anyqtady. Onyń áreket etý jospary shıelenisti oshaqtar qurý arqyly narazylyq aksııalary jáne jappaı tártipsizdikter uıymdastyra otyryp eldegi jaǵdaıdy turaqsyzdandyrýdy qarastyrǵan. Osynyń aıasynda balama úkimetti qalyptastyryp, áreket etýshi bıliktiń qurylymyn ózgertýdi josparlaǵan», – dedi Ulttyq qaýipsizdik komıteti baspasóz qyzmetiniń ókili Rýslan Karasıov:
Brıfıngte sondaı-aq, Rýslan Karasıov Atyraý, Astana, Almaty, Oral, Qyzylorda qalalarynda ótken jyly Tóleshovtyń qarjylandyrýymen jer reformasyna qarsy narazylyq toptyń qurylǵanyn jetkizdi.
«Narazylyq aksııalary budan da erterek ótýi tıis bolǵany tolyqtaı anyqtaldy. Alaıda, Tóleshovtiń ustalýyna baılanysty onyń merzimderin aksııany tikeleı uıymdastyrýshylar óz betterinshe ózgertken, olardyń keıbireýleri búginde quryqtalǵan», – dedi ol.
Búgingi tańda Ulttyq qaýipsizdik komıtetiniń organdary Tóleshovtiń qylmystyq áreketterin iske asyrý maqsatynda paıdalanýǵa josparlaǵan edáýir qarý-jaraq, oq dáriler men jarylǵysh zattardy jasyrǵan oryndy anyqtap, olardy tárkilegen.
«О́tken demalystarda Ulttyq qaýipsizdik komıtetiniń qyzmetkerleri Astana, Almaty jáne Shymkent qalalarynda Tóleshovtiń birqatar sybaılas jaqtastaryn ustady. Olardyń qatarynda Bas Prokýrorynyń burynǵy birinshi orynbasary, Qazaqstan Respýblıkasy Konstıtýsııalyq keńesiniń burynǵy múshesi, ekinshi synypty ádilet keńesshisi Ilııas Baqtybaev, Ońtústik Qazaqstan oblystyq ishki ister departamentiniń eks-basshysy, general-maıor Hıbratýlla Dosqalıev, atalǵan departament basshysynyń burynǵy birinshi orynbasary, polısııa polkovnıgi Sáken Aıtbekov, Qazaqstan Respýblıkasy Qorǵanys mınıstrligi Ońtústik óńirlik qolbasshylyǵynyń 35748 jáne 55652 áskerı bólimderiniń komandırleri, polkovnıkter Bekzat Jýmın jáne Qaırat Pernebaev bar», – dedi Rýslan Karasıov.
Aıta keteıik, atalǵan tulǵalar ustalyp, ýaqytsha tergeý ızolıatoryna qamalǵan. Olarǵa qatysty bultartpaý sharalaryn qoldaný máselesi sheshilýde.
Talǵat Raıymbek.
Derek, foto: Bas prokýratýranyń baspasóz qyzmeti.