Keshe Máskeý qalasynda Táýelsiz Memleketter Dostastyǵyna qatysýshy memleketter Qorǵanys mınıstrleri keńesiniń otyrysy ótti. Otyrysqa Qorǵanys mınıstri Imanǵalı Tasmaǵambetov bastaǵan qazaqstandyq delegasııa qatysty.
Basqosý barysynda taraptar 18 máseleni talqylady. Onyń ishindegi bes másele TMD Áýe shabýylyna qarsy qorǵanystyń biriktirilgen júıesin damytý jáne ony qamtamasyz etý tóńireginde boldy.
Sondaı-aq, kún tártibine bıylǵy jyldyń 30 shildesi men 13 tamyzy aralyǵynda ótetin 2016 jylǵy halyqaralyq Armııa oıyndarynda TMD-ǵa qatysýshy memleketterdiń Qarýly Kúshterinen qatysatyn komandalar jóninde másele engizildi. Aldyn ala belgili bolǵan derekterge súıensek, Armııa oıyndaryna 47 memleketten 114 komanda qatysady. Halyqaralyq saıysta 23 túrli baıqaý ótkizilmek, olardyń ishinde eki baıqaý – «Artıllerııa alaýynyń sheberi» jáne «Mergen shebi» saıystary alǵash ret Qazaqstan Respýblıkasy aýmaǵyndaǵy polıgondarda ótkiziledi. Aıta keteıik, qazaqstandyq áskerı qyzmetshiler baıqaýdyń barlyq túri boıynsha qatysady.
Qorǵanys vedomstvolarynyń basshylary TMD-ǵa múshe memleketterdiń áýe-ǵaryshtyq qorǵanysy týraly tujyrymdamasyn maquldady. Atalǵan tujyrymdama TMD-ǵa múshe memleketterdiń áýe shabýylyna qarsy qorǵanysynyń biriktirilgen júıesin birlesken qorǵanysty tek áýede ǵana emes, áýe-ǵaryshtyq deńgeıinde qamtamasyz etýdi ári qaraı jetildirý qajettiligimen baılanysty.
Qorǵanys mınıstrleriniń kezdesýi barysynda TMD Qorǵanys mınıstrleri keńesiniń janyndaǵy Úılestirý komıtetiniń áskerı bilim máselesi boıynsha qyzmeti men Dostastyq elderiniń Qarýly Kúshterindegi memlekettik qupııalardy qorǵaý qyzmetteriniń ózara is-qımyly talqylandy.
Otyrys barysynda birneshe baıandama tyńdaldy. Qazaqstandyq delegasııanyń atynan elimiz Qarýly Kúshteriniń Memlekettik qupııalardy qorǵaý jáne aqparat qaýipsizdigi bas basqarmasynyń bastyǵy polkovnık Qaınarbek Qojahmetov baıandama jasady. Ol áskerı yntymaqtastyq tóńiregindegi memleketaralyq qupııalardyń saqtalýyn qamtamasyz etýdegi qyzmettiń ózara is-qımyly týraly baıandady.
Budan basqa, 2015 jyly qarýly kúshterdegi áskerı salanyń yntymaqtastyǵy jáne avıasııalyq ushýlardyń qaýipsizdik jaǵdaıy boıynsha TMD-nyń shartty-quqyqtyq bazasyna baǵa berildi. Qorǵanys vedomstvolarynyń basshylary keńesiniń sońynda TMD-ǵa múshe memleketterdiń qarýly kúshterindegi Shtabtar bastyqtary komıtetiniń qyzmetterin jáne 2020 jylǵa deıin qarýly kúshterde áskerı qoldanbaly sport túrlerin damytýdy retteıtin qujattar qabyldandy.
«Egemen-aqparat»