Qaraǵandynyń irgesindegi Spassk oqý ortalyǵynda jastardyń «Aıbyn» respýblıkalyq áskerı-patrıottyq jıyny ótip jatyr. Maýsymnyń 17-si kúni márege jetetin bul sharaǵa elimizdiń joǵary oqý oryndaryndaǵy áskerı kafedralardyń stýdentteri, áskerı mektepterdiń kadetteri jáne áskerı-patrıottyq klýbtardyń músheleri qatysýda.
«Aıbyn» jıynynyń ashylý saltanatyna Qaraǵandy oblysynyń ákimi Nurmuhambet Ábdibekov, Qorǵanys mınıstriniń birinshi orynbasary – Qarýly Kúshter Bas shtabynyń bastyǵy, general-polkovnık Sáken Jasuzaqov, Májilis depýtattary Qýanysh Sultanov, Maıra Aısına, Baqytbek Smaǵul, sonymen qatar, Bas áskerı prokýror, ádilet general-leıtenanty Erǵalı Merzadınov, ushqysh-ǵaryshker, «QazǴarysh» AQ vıse-prezıdenti, avıasııa general-maıory Aıdyn Aıymbetov, UQK tóraǵasynyń orynbasary, general-maıor Darhan Dilmanov jáne basqa da resmı tulǵalar qatysty.
О́ńir basshysy óz sózinde osynaý respýblıkalyq áskerı-patrıottyq jıyndy ótkizý Qaraǵandy oblysyna ekinshi jyl senip tapsyrylyp otyrǵanyn, oǵan qatysýshy ár azamatqa óz óńiriniń atynan kelýi de úlken abyroı ekenin atap ótti.
– Bul jerge óz ortasynan iriktelip kelgen eń laıyqty jigitter jınalyp otyr, – dedi Nurmuhambet Ábdibekov. – Kópshiligińiz áskerı daıyndyq barysynda úzdik nátıje kórsetip, áskerı adam bolam, Otan aldyndaǵy paryzymdy abyroımen atqaramyn degen maqsattaryńyzǵa nyq qadam basyp kelesizder. Búgin sizderge naǵyz qyzmet aldynda kúsh jıyp, jetistikterińizdi kórsetý múmkindigi týyp otyr.
Ashylý saltanatynyń resmı bóliginen soń qonaqtar nazaryna qoıan-qoltyq jekpe-jekter, áskerı atý boıynsha kórsetilimder, qurmet qaraýyly rotasynyń, arnaıy maqsattaǵy bólimshelerdiń saltanatty sherýi, ushý tobynyń óneri usynyldy.
Aıta ketý kerek, bul jıynnyń negizgi maqsaty – jastar arasynda áskerı-patrıottyq tárbıe jumysyn jetildirý.
Qaırat ÁBILDINOV,
«Egemen Qazaqstan»
Qaraǵandy oblysy