Budan jarty jyldan astam ýaqyt buryn, dáliregi, 2015 jylǵy 22 jeltoqsan kúni AQSh-ta turatyn Marva esimdi musylman qyz prezıdenttikke úmitker mıllıarder Donald Tramptyń NBC News telearnasy musylmandarǵa qatysty bergen suhbatynda jasaǵan janjaldy málimdemesine baılanysty oǵan arnaıy hat jazyp, kúlli álemdi dúr silkindirgen edi. Hattyń áleýmettik jelilerde jarııalanǵan mátinine oraı oǵan júzdegen myń adam pikir qosyp, taqyrypty talqylaǵan bolatyn.
Arada biraz ýaqyt ótip ketkenimen, sol hat áli óziniń máni men mazmunyn joıǵan joq. Al sodan beri birshama tynshyp qalǵan Donald qaıtadan baıaǵy ánine basa bastady. Biz osy hattyń sol kezde ras.kz saıtynda jarııalanǵan nusqasyn kóshirip jarııalaǵandy jón kórdik.
Prezıdenttikte úmiti bar adam Qurama Shtattarda turatyn musylmandar jóninde málimetter bazasy, sondaı-aq olardy «qadaǵalap otyratyn basqa da júıeler bolýy kerek» ekenin sóz etken.
Basylym habarlaǵandaı, mıllıarderdiń málimdemesi musylmandar qaýymyn qatty ashyndyryp jibergen. Olaı bolmaǵanda she, Tramp musylmandardy arnaıy kartamen, ózderiniń kim ekenin jáne qaı dindi ustanatynyn kórsetetin kýálikpen júrýleri kerek dep esepteıdi. Munyń ózi AQSh musylmandarynyń eldegi ekinshi surypty adamdar bolyp qalǵandaryn aıǵaqtar edi. Osyny baıqaǵan musylman qaýymy birden úmitkerge qarsy shyqty. Solardyń arasynda bir jas musylman qyzynyń posty Trampqa qaıtarǵan jaýaptardyń eń úzdigi bolyp eseptelip otyr.
Marva óz hatynda bylaı deıdi:
«Qurmetti @realdonaldtrump. Meniń atym – Marva, men de musylmanmyn. Men siz bizge ID-belgisin taǵyp qoımaqshy bolyp jatyr dep estidim. Sol sebepti men olardyń birin ózime tańdap almaqshymyn. Al siz maǵan qarap, musylman ekenimdi op-ońaı bile qoımassyz, sondyqtan men ózimniń musylman ekenimdi baıqatatyn tósbelgini maqtanyshpen taǵyp alǵan bolar edim. Men beıbitshilik belgisin tańdadym, sebebi, meniń Islamymnyń ózi tap osy uǵymdy bildiredi.
Meni ádiletsizdikke qarsy shyǵyp, birlikke umtylýǵa úıretken Islam. Jazyqsyz bir adamdy óltirýdiń búkil adamzat balasyn óltirgenmen birdeı bolyp tabylatynyn úıretken Islam. Siz bizdi qadaǵalap turady dep estidim. Tamasha! Siz endi menimen birge jergilikti mekteptegi Cancer Awareness uıymyna nemese meniń baqyt jasaýǵa arnalǵan jumys ornyma kele alasyz. Sizdiń sondaı-aq meniń jergilikti meshitime baryp, onda úı-jaısyz júrgenderge qalaı sendvıchter men býterbrodtar, aýqat ishkisi keletinderdiń bárine tegin as daıyndalyp jatqanyn kórýge de múmkindigińiz bar. Sol kezde siz meniń musylman bola otyryp, sizden bir de kem emes amerıkalyq ekenimdi kóresiz. Bálkim, siz meniń izimmen júre berseńiz, meniń ózińizden eshbir tómen adam emes ekenimdi de kórersiz. Salamý aleıkým (Sizge beıbitshilik tileımin)».
Hat bar-joǵy eki kúnniń ishinde 80 myń sheır jınaǵan. Al keıinirek 5 mıllıonnan astam adam oqyp shyqqan.
Talǵat Raıymbek.