Polısııa qyzmetkerine asyrandy tóbetti aıtaqtaǵany nesi?!
Jaqynda Jezqazǵan qalasynda úsh polısııa qyzmetkeri qoǵamdyq orynnyń shyrqyn buzǵany úshin eki jumyssyz erkekti tártipke shaqyrǵan. Tártip saqshylary bala-shaǵanyń kózinshe araq iship, balaǵat sóz aıtyp otyrǵan ekeýiniń ústinen ákimshilik hattama toltyra bastaıdy. Mine, sol kezde álgi ekeýdiń biri polısııa qyzmetkerlerine rotveıler tuqymdy taıynshadaı tóbetti aıtaqtap qosqan. Eger de tártip saqshysynyń biri tapanshasyn sýyryp alyp oq atpaǵanda, qabaǵan ıttiń qandaı is qylary bir qudaıǵa ǵana aıan edi.
Álbette, qorqytý úshin atqan oqtan ıt zardap shekken joq. Esesine, ıtti aıtaqtap qosqan ıesiniń endi basyna qara bult úıirileri sózsiz. Qazirgi tańda onyń ústinen Qylmystyq kodeksiniń 379-babynyń 1-tarmaqshasy boıynsha («Bılik ókiline baǵynbaý») qylmystyq is qozǵaldy. Eger de kúdiktiniń kinási dáleldener bolsa, onda oǵan 100 aılyq eseptik kórsetkishke deıingi mólsherde aıyppul salynady, ne ol 120 saǵatqa deıingi merzimge qoǵamdyq jumystarǵa tartylady, bolmasa 45 táýlikke deıingi merzimge qamaqqa alýǵa jazalanady.
Qaırat ÁBILDINOV,
«Egemen Qazaqstan»