Ystanbuldyń yqylasyna bólendi

Qazaq ulttyq balet óneri baǵyna juldyzdaı jarqyrap týǵan jeńimpaz balamyzdyń aty-jóni – Baqtııar Adamjan. Jaqynda «Astana Opera» memlekettik opera jáne balet teatrynyń jetekshi solısi Túrkııanyń Ystanbul qalasynda ótken Balet ártisteriniń V halyqaralyq baıqaýynda Bas júldeni qanjyǵasyna baılady. Qazaqstan, Reseı, Avstralııa, Brazılııa, Bolgarııa, Japonııa, Kanada, Ońtústik Afrıka, Ońtústik Koreıa jáne basqa da birqatar elderden iriktelgen qatysýshylar Sıýreı operalyq teatrynda (Qadykeı aýdany, Ystanbul qalasy) bas qosqan bolatyn. Úsh kezeń boıynsha ót­kizilgen óner syny 13 shildege deıin jalǵasty. Oǵan jastary 15 pen 26 aralyǵyndaǵy jastar qatysty. Saltanatty Gala-konsertte Baqtııar Adamjan men aqtyq saıysqa joldama alǵan jeńimpaz jastar konkýrs repertýarynan úzdik nómirler usyndy. Berlın Memlekettik baletiniń kórkemdik jetekshisi, «Tokıo-balettiń» shyǵarmashylyq jónin­degi keńesshisi Vladımır Malahov tóraǵalyq etken qazylar alqasy quramynda R.Nýreev atyndaǵy balet ártisteriniń halyqaralyq kon­kýrsynyń dırektory R.Bokor, Skope (Makedonııa) Bı teatry jáne bı festıvaliniń dırektory R.Rısımkın, «Dance for You» jýrnalynyń redaktory M.Vıerý, Qazaqstannyń halyq ártisi G.Tutqybaeva, Boston baletiniń kórkemdik jetekshisi M.Nıssınen, Gollandııalyq bı festıvaliniń kórkemdik jetek­shisi, Rotterdamdaǵy О́ner ýnı­­versıtetiniń «Kodarts» bı aka­de­mııa­synyń atqarý keńesiniń mú­shesi S.Vıýrsten jáne basqalar bar. Jetekshi solıst ystanbuldyq sahnada L.Mınkýstyń «Don Kıhot», «Baıaderka», B.Asafevtiń «Parıj jalyny», S.Pýnıdiń «Esmeralda» klassıkalyq baletterinen varıasııalar oryndady. Munymen qatar, Baqtııar arnaıy eki zamanaýı nómir – qazaqstandyq horeograf Sııazbek Ýálıbekovtiń «Meniń bóligim» (Part of me) jáne Isıan Chjannyń (Beıjiń q., Qytaı) «Oıaný» (In the wake) týyndysyn usyndy. Baqtııar Adamjannyń bılege­nin alǵash kórgen belgili beıjińdik horeograf Isıan Chjan, ártistiń bolashaǵy zor jáne de qaı jaǵynan bolsyn joǵary marapatqa laıyq ekenin atap ótti. – Nómirdiń aldynda Baqtııar­dyń stıli men tehnıkasyn anyqtaý maqsatynda bılep berýin ótindim. Solıstiń daıyndyǵy kóńil kón­shitedi, ol bárin jyldam ári lezde qaǵyp alady, solaı bola tura aldaǵy ýaqytta áli kóp nárseni úırenýi múmkin. Onymen birigip jumys isteı bastaǵan alǵashqy sátten-aq ózgeristi baıqadym – osy qysqa ýaqyt ishinde ártis ózi úshin jańa stıldi meńgerip, aı­tar­lyqtaı bıikke kóterildi. Men onyń sheberligi men alǵan bilimin pash etýge tyrystym, – deıdi Isıan Chjan. О́z kezeginde Baqtııar Adamjan daıyndyqtyń alǵashqy mezetinde-aq jeńiske jetýge talpynǵanyn aıtty. – Ystanbuldaǵy konkýrsqa álem­niń ár óńirinen úzdik bıshiler keldi, sol sebepti biz bir-birimizden molynan tájirıbe almasýǵa ty­rystyq. Túrik kórermeni meniń ónerimdi ystyq yqylaspen qarsy aldy. Zamanaýı horeo­grafııadan keıin klassıkalyq bıge «aýysý» ońaı bolǵan joq. Shynyn aıt­qanda, boıymdy tylsym bir kúsh bı­lep aldy. Jaqynda ulym dúnıege kelgen bolatyn. Perzentimniń qýanyshynan  áserlenip, qussha sharyqtaǵan shyǵarmyn. Jeńis adamǵa burynǵydan da zor jaýap­kershilik júkteıdi. Endeshe, aldymda munan da bıik asqaraly asýlar tur, – dedi jýrnalıstermen oı bólisken Baqtııar Adamjan. Taǵy bir aıta ketetin jaıt, konkýrstyq baǵdarlamanyń tórt klassıkalyq varıasııasyn daıyndaýmen «Astana Opera» balet­tik trýppasynyń kórkemdik je­tekshisi, Reseıdiń halyq ártisi Altynaı Asylmuratova men pedagog-repetıtor, Reseıdiń eńbek sińirgen ártisi Konstantın Zak­lınskıı aınalysty. «Ártister úshin halyqaralyq konkýrstardyń orny qashanda mańyzdy sanalady, sebebi, daıyndyq pen dodaǵa qatysý ónerdiń órisin ósiredi, damytady, bul, tipti, tózimdilikti tek­serýmen teń. Jalpy, munda kon­kýrsqa arnalǵan jáne kon­kýrsqa arnalmaǵan ártis deıtin uǵymdar bar, óıtkeni, mundaı aýyrtpalyqty kóterip shyǵatyn jandar neken-saıaq. Balettiń kóp jaǵdaıda sportpen uqsas bolýy sodan. Balet syny úzdiksiz daıyndyqty talap etedi. Sol sebepti jastyq shaqta olarǵa túrli óner báıgelerinde baqtaryn synaýǵa týra kelip jatady. Mine, sondaı halyqaralyq dodada Baqtııar Adamjan bizdiń úlken balettik áýletimizdi jerge qa­rat­qan joq, laıyqty deńgeıde óner kórsetti» – dep Altynaı Asylmuratova sapar týraly áńgimesin túıindedi.  Qarshyǵa KÚLEN