Bıylǵy Tamyz keńesiniń taqyryby – «Bilimdi el – Máńgi el!» Bolashaqqa umtylǵan ulttyń urpaǵy uıatqa qalmaýy úshin, eń aldymen, bilimdi bolǵany abzal. Osyndaı ustanymdy uran qylyp ustaǵan Bilim jáne ǵylym mınıstrligi keleli keńesti jyl saıyn jalǵastyryp keledi. Bıylǵy basqosýdyń atap aıtar aıryqsha tustary kóp. Jetistikteri jeterlik.
Keńes aıasynda Bilim jáne ǵylym mınıstrliginiń Joǵary jáne joǵary oqý ornynan keıingi bilim departamenti «Úsh tilde oqytý: qazaqstandyq tájirıbe jáne sheteldik úlgiler» taqyrybynda paneldik sessııa ótkizdi. Ondaǵy maqsat – joǵary jáne joǵary oqý ornynan keıingi bilim salasynda úsh tilde oqytýdy qalyptastyrý, onyń ishinde aǵylshyn tilin meńgerýdiń deńgeıin jetildirý, aldyńǵy qatarly pedagogıkalyq teorııany jáne pánderdi aǵylshyn tilinde oqytýdyń praktıkalyq ádisterin ıgerý, taǵysyn-taǵylar.
Mamandyq daıarlaýdyń mańyzyn túsingen keńeske kelýshiler «Akademııalyq ortadaǵy ınnovasııalar kadrlardy daıarlaýdyń sapasyn arttyrýdyń faktory retinde» degen taqyrypta bátýáli basqosý ótkizdi. Onyń negizgi maqsaty kadrlardy daıarlaýdyń sapasyn arttyrý úshin akademııalyq ortadaǵy ınnovasııalar salasynda talqylaý júrgizý jáne tájirıbemen almasý bolyp tabylady. Osy sessııa barysynda pedagogıkalyq kadrlardy daıarlaý máseleleri, onyń ishinde kásiptik-pedagogıkalyq daıarlyqtyń ereksheligi jáne róli, pedagogıkalyq sheberlikti arttyrýdyń joldary jáne bilim alýshylarmen jumys jasaýdyń jańa nysandary men ádisterin izdeý boıynsha máseleler qarastyryldy.
Sessııa jumysy barysynda bilim berý mazmunyn jańartý aıasynda pedagogıkalyq kadrlardyń kásibı biliktiligin arttyrý, pedagogıka menedjmentin jetildirý, til men pánniń kiriktirilip oqytý ádistemesiniń erekshelikteri jáne basqa da máseleler basa nazarda boldy.
Sonymen qatar, «Jańartylǵan bilim mazmuny jaǵdaıyndaǵy arnaıy jáne ınklıýzıvti bilim berý úrdisi jáne keleshegi» paneldi sessııasy da óz dárejesinde ótti. Alqaly jıynǵa qatysýshylar múmkindigi shekteýli balalarǵa bilim berýdiń ózekti problemalaryn talqylap, tájirıbe almasty.
Múmkindigi shekteýli balalardyń bilim alýǵa quqyǵy Qazaqstan Respýblıkasynyń Konstıtýsııasynda, kóptegen zańdarda bekitilgen. Elimizde múmkindigi shekteýli balalarǵa arnalǵan 100 arnaıy mektep, 38 arnaıy balabaqsha, 55 psıhologııalyq-medısınalyq-pedagogıkalyq konsýltasııa kabıneti, 142 psıhologııalyq-pedagogıkalyq túzeý kabıneti, 13 ońaltý ortalyǵy, 734 logopedııalyq pýnkt qyzmet etedi.
Keleli keńestiń aıasynda budan bólek birneshe basqosýlar, sheberlik sabaqtary ótip, Qazaqstannyń túkpir-túkpirinen jınalǵan ustazdar ujymy bir-birimen tájirıbe almasyp, tyǵyz baılanys ornatýǵa múmkindik aldy.
Sonymen qatar, «Táýelsizdik saraıynyń» tórine qoıylǵan kórme de kelgen qonaqtardy qyzyqtyrmaı qoımady. Keńeske kelgen meımandar atalmysh kórme arqyly elordanyń bilim berýdegi jańashyl ádistemelerimen, daryndy balalardyń jetistikterimen, bilim berý mekemeleriniń úzdik ınnovasııalyq jobalarymen tanysa aldy.
Táýelsizdik jyldarynda elimiz 1356 jańa mektep, 450-shaqty balabaqsha salǵan. Jekemenshik sektory 200-ge jýyq balabaqsha ashqan. Búgingi tańda 7 myńnan astam mektep, 9 myńnan astam balabaqsha, 807 kolledj ben 125 JOO jumys jasap otyr. Oqýshylar sany 2,7 mln adamnan assa, olarǵa bilim beretin pedagogtar sany 350 myńnan asqan. Qazaqstandyq oqýshylardyń halyqaralyq deńgeıdegi ıntellektýaldyq jarystarda jeńip alǵan júldeler sany jyl saıyn artyp keledi. 5700-den astam bala túrli deńgeıdegi olımpıadalar men jarystardan abyroımen oralǵan. Osynyń ózi muǵalimderdiń mańdaıterimen keletinin esten shyǵarmaǵanymyz abzal.
Dúnıedegi mamandyq ataýlynyń tóresi – ustazdyq. Sebebi, muǵalim barlyq mamandyq ıesin tárbıeleıtin, oqytyp úıretetin jandar. Ustaz bergen tárbıe árbir jannyń ómirine jol silter shamshyraq sekildi. Sondyqtan ulaǵatty ustazdarǵa búkil adam balasy qurmetpen bas ıedi.
«Bilimdi el – Máńgi el!» dep atalǵan Tamyz keńesi de osymen támam. QR Premer-Mınıstriniń orynbasary D.Nazarbaeva sózin quttyqtaýmen bastap, qurmetteýmen aıaqtady. Ol keńeske kelgen ustazdardyń ishinen bilim berý salasyna eren eńbek sińirip, eleýli úles qosqan muǵalimderge alǵys hat tabystady.
Raýan QAIDAR,
«Egemen Qazaqstan»
Sýretterdi túsirgender
Erlan OMAROV,
Mansur HAMIT