Memleket basshysy Alem.ai battle jáne AI Governance Cup baıqaýlarynyń jeńimpazdaryn marapattaý rásiminde sóz sóılep, búginde álemniń asa joǵary jyldamdyqpen damyp kele jatqanyna nazar aýdardy, dep habarlaıdy Egemen.kz.
Prezıdenttiń pikirinshe, qazirgideı qubylmaly, dúrbeleńge toly zamanda básekege qabiletti el bolyp, kósh sońynda qalmaı, órkenıetti elge saı ósip-órkendeı berý qajet.
«Elimizde osy baǵytta naqty jumys istelip jatyr. Jasandy ıntellekt jáne sıfrlyq damý mınıstrligi quryldy. Jańa tehnologııalardy engizý úshin zańnamalyq negiz jasalyp, Sıfrlyq kodeks qabyldandy. «Jasandy ıntellekt týraly» Zań kúshine endi. Taıaý arada Qazaqstannyń sıfrlyq damý baǵdaryn aıqyndaıtyn Digital Qazaqstan strategııasy bekitiledi. Bárińizge belgili, bıyl elimizde – «Sıfrlandyrý jáne jasandy ıntellekt jyly». Sondyqtan aldymyzda áli de kóp jumys bar. Shıraq qımyldap, tutas qoǵam bolyp tabandy eńbek etýimiz kerek», dedi Memleket basshysy. Prezıdent: Ozyq oıly jastar elimizdi bıik belesterge bastaıdyPrezıdent sıfrlyq tehnologııalar men jasandy ıntellektiniń qarqyndy damýy tásilderdi únemi jańartyp otyrýdy talap etetinin atap ótti.
«Esepteýish ınfraqurylymyn ilgeriletý mańyzdy baǵyt bolyp qala beredi. Sýperkompıýter klasteriniń iske qosylýy elimizdiń tehnologııalyq derbestigin nyǵaıtýdaǵy aıtýly ýaqıǵa boldy. Kelesi maqsat – elimizde Derekterdi óńdeý ortalyǵy alqabyn qurý. Atalǵan aýqymdy jobany iske asyrý jańa ınvestısııa tartýǵa jáne óńirlik sıfrlyq hab retindegi pozısııamyzdy kúsheıtýge múmkindik beredi. Jappaı sıfrlandyrý jáne jasandy ıntellektini engizý elimizdi jan-jaqty jańǵyrtýdyń negizgi faktorlarynyń biri sanalady. Bul memlekettik basqarý júıesinen bastap kreatıvti ındýstrııaǵa deıingi salalardy qamtıdy. Jazda Astanada «Bolashaq oıyndary» ótedi. Dástúrli erejeler men kıbersportty ushtastyratyn jarysqa álemniń 50 elinen myńǵa jýyq sportshy qatysady. Jańa sport túri ozyq tehnologııalardy kúndelikti turmysqa jedel beıimdeýge, eń bastysy, jastar arasynda sportty nasıhattaýǵa jol ashady», dedi Qasym-Jomart Toqaev.Eske sala keteıik, búgin Prezıdent Alem.ai halyqaralyq jasandy ıntellekt ortalyǵyn aralap kórip, birqatar bilim berý bastamasyn iske qosý rásimine qatysty.
Sondaı-aq Qasym-Jomart Toqaev «Bolashaq oıyndary-2026» halyqaralyq týrnırine deıingi keri sanaqty ınteraktıvti formatta iske qosty.