Kongoda dárigerler ebola vırýsynyń jańa shtammyn anyqtady, dep jazady Egemen.kz.
Kongo Demokratııalyq Respýblıkasynyń shyǵysynda, Itýrı provınsııasynda Ebola vırýsy órship tur. Afrıkanyń aýrýlardy baqylaý jáne aldyn alý ortalyǵy (Africa CDC) shamamen 246 kúdikti jaǵdaı men 65 ólimdi tirkedi. Bul týraly Associated Press agenttigi habar taratty.
Infeksııanyń negizgi oshaǵy Mongvalý jáne Rvampara aýdandarynda shoǵyrlanǵan. Jaqyn mańdaǵy Býnııa qalasynda da qazir tekserilip jatqan kúdikti jaǵdaılar anyqtaldy. Zerthanada rastalǵan ınfeksııalary bar tórt pasıent kóz jumdy.
Aldyn ala testileý boıynsha 20 synamanyń 13-i oń nátıje berdi.
Ebola – sırek kezdesetin, biraq óte qaýipti vırýstyq aýrý. Ol juqtyrǵan adamnyń bılogııalyq suıyqtyqtarymen nemese lastanǵan zattarmen tikeleı baılanys arqyly beriledi. Osydan bes aı buryn Kongo resmı túrde kesapattyń aıaqtalǵanyn jarııalaǵan edi. Ol kezde 43 adam qaıtys boldy. Endi mine vırýstyń jańa ushqyny qaıta shyǵyp otyr.
Qazir mamandar aýrýdyń jańa tolqynyn qaı shtamm týdyrǵanyn anyqtap jatyr. Eń qaýipti jáne keń taralǵan nusqa – Zaır ebolavırýsy. Ol adamdar men prımattarda aýyr gemorragııalyq qyzbany týdyrady.
Africa CDC Kongo, Ýganda jáne Ońtústik Sýdan bıligi men halyqaralyq seriktesterdiń qatysýymen shuǵyl jınalysty bastady. Kún tártibinde – epıdemıologııalyq qadaǵalaýdy, shekaralyq baqylaý men aldyn alý sharalaryn kúsheıtý, sondaı-aq birlesken is-qımyldardy úılestirý máseleleri tur.
Ýgandada ebola vırýsynan 11 adam qaza tapty
Itýrı provınsııasy astanasy Kınshasadan myń shaqyrymnan astam jerde ornalasqan. Aımaqqa jetý óte qıyn. Onda nashar joldar, qarýly toptardyń belsendiligi jáne halyqtyń joǵary kóshi-qony, sonyń ishinde taý-ken jumystarymen baılanys tyǵyz. Osynyń barlyǵy dárigerlerdiń jumysyn edáýir qıyndatady jáne vırýstyń taralý qaýpin arttyrady.