PGL Astana 2026 halyqaralyq týrnıri Counter-Strike 2 dıssıplınasy boıynsha Astanada sátti bastaldy. Barys Arena arenasynda ótip jatqan jarystyń alǵashqy oıyn kúni shamamen 7 myń kórermen jınaldy, dep habarlaıdy Egemen.kz.
Týrnırdiń jartylaı fınalyna MOUZ, Team Spirit, Magic jáne Falcons komandalary shyqty. Alǵashqy kúnniń ózinde kórermen tartysty matchtardy, jarqyn oıyn sátterin jáne is-sharanyń joǵary deńgeıde uıymdastyrylǵanyn tamashalady.
Jankúıerlerdiń erekshe nazary qazaqstandyq oıynshylardyń ónerine aýdy. Olar kıbersportshylardyń árbir sátti áreketin qoldap otyrdy.
Týrnır qonaqtarynyń qatarynda Dáýren Qystaýbaev, FURIA Esports oıynshysy Danııl Golýbenko, strımer Slava Býster, PGL týrnırleriniń júrgizýshisi Djeıms Banks, sondaı-aq álem chempıony Gabrıel Toledo boldy.
«Barys Arena-daǵy atmosfera keremet boldy, kıbersport tóńireginde mundaı qyzyǵýshylyqty kópten beri kórmeppin. Trıbýnalarda naǵyz energııa sezildi. Adamdar komandalardy qoldap, urandap, árbir raýndqa shynaıy jankúıer boldy. Osyndaı týrnırge qatysa alǵanyma óte qýanyshtymyn», dedi jankúıerlerdiń biri.
Uıymdastyrýshylar men sarapshylardyń aıtýynsha, mundaı týrnırlerdi ótkizý oqıǵalyq týrızmdi damytýǵa jáne Astananyń iri halyqaralyq kıbersporttyq is-sharalardy qabyldaıtyn alań retindegi bedelin nyǵaıtýǵa yqpal etedi. Sheteldik qonaqtar týrnırdiń joǵary deńgeıde uıymdastyrylǵanyn, elordanyń zamanaýı ınfraqurylymyn jáne Qazaqstan jastarynyń kıbersportqa qyzyǵýshylyǵy artyp kele jatqanyn atap ótti.
Júlde qory – 1,6 mln dollar: Elordada PGL Astana 2026 halyqaralyq týrnıri bastaldy
Búgin, 16 mamyr kúni, týrnır ekinshi oıyn kúniniń matchtarymen jalǵasady. Jankúıerlerdi myqty komandalardyń jańa kezdesýleri men úlken kıbersport merekesiniń erekshe atmosferasy kútedi.