Rıo Olımpıadasynyń qola júldegeri Aleksandr Zaıchıkovti oblys ákimi Qyrymbek Kósherbaev qabyldap, halyqtyń jáne óziniń atynan quttyqtady. Sonymen qatar, aýyr atletshige Toyota Land Cruiser avtokóliginiń kiltin tabystady.
«Olımpıadada sen tek ziltemirdi kóterip qana qoıǵan joqsyń, búkil qazaqstandyqtardyń rýhyn asqaqtattyń. Aleksandrdyń kelesi medali altyn bolatynyna senemin. Biz saǵan aldaǵy jarystarǵa, ásirese Tokıoda ótetin Olımpıadaǵa daıyndyq úshin barlyq jaǵdaıdy jasaýǵa ázirmiz. Sonymen qatar, batyr uldy tárbıelep, ósirgen anasyna zor alǵys aıtamyz», – dedi oblys ákimi.
Munan soń Aleksandr Zaıchıkov Olımpıada kezinde jankúıer bolyp, qoldaý kórsetken qazaqstandyqtarǵa, ásirese jerlesterine úlken alǵysyn jetkizdi. Ol: «Men Rıoda júrip Qazaqstan halqynyń qoldaý bildirgenin sezindim. Qyzylordalyqtar tańǵy 4-te jınalyp, meniń ónerimdi tamashalaǵandaryn bilemin. Sizderdiń qoldaýlaryńyz maǵan kúsh berdi», – dedi. Kezdesý sońynda aımaq basshysy aýyr atletshiniń bapkerine 5 mln. teńgeniń sertıfıkatyn tapsyrdy.
Talǵat RAIYMBEK