Ziltemirshi Zaıchıkov

jerlesteriniń zor qurmetine bólendi Tolaǵaı týǵan jerine keldi. Syn sátinde ózine júktelgen jaý­ap­­kershilikti tizesi dirildemeı kó­terip, Rıo Olımpıadasynyń qola júldesin qanjyǵasyna baılap kelgen Aleksandr Zaıchıkovti Syr boıynyń halqy ystyq yqylaspen qarsy aldy. Ushaqtan túsip, jur­tynyń qushaǵyna kúmp bergen batyr uldyń qýanyshy kózinen kórinip turdy. Qyzylordalyq jastar men qarapaıym turǵyndar Aleksandrdyń qurmetine áýejaıǵa jınalyp, ystyq yqylastaryna bóledi. Munan soń Rıo Olımpıadasynyń júldegerin oblys ákimi Qyrymbek Kósherbaev quttyqtap, jyly lebizin jetkizdi. – Olımpıadada sen tek ziltemirdi kóterip qana qoıǵan joqsyń, búkil qazaqstandyqtardyń rýhyn as­qaqtattyń. Aleksandrdyń kelesi medali altyn bolatynyna senemin. Biz Aleksandrdyń aldaǵy jarystarǵa, ásirese, Tokıoda ótetin Olımpıadaǵa daıyndyǵy úshin barlyq jaǵdaıdy jasaýǵa daıynbyz. Sonymen qatar, batyr uldy tárbıelep ósirgen anasyna zor alǵys aıtamyz,– dedi Qyrym­bek Eleýuly. Aımaq basshysy Qyrymbek Kósher­baev aldaǵy ýaqytta ziltemir­shilerdi daıyndaý úshin Qyzylordada halyqaralyq talaptarǵa saı aýyr atletıka ortalyǵy salynaty­nyn jetkizdi. «Men barlyq qazaq­standyqtarǵa, ásirese, jerlesterime úlken alǵysymdy aıtamyn. Rıo­da júrip, olardyń qoldaýyn sezin­dim. Qyzylordalyqtar tańǵy 4-te jınalyp, meniń ónerimdi tamashalaǵandaryn bilemin. Sizder­diń qoldaýlaryńyz maǵan kúsh berdi»,  deıdi Aleksandrdyń ózi. Aleksandrdyń anasy men bap­keri de barsha qoldaý kórsetken qazaqstandyqtarǵa, jerlesterine alǵystaryn aıtty. Munan soń aımaq basshysy Alek­­sandrǵa «Toyota Land Cruiser» av­tokóliginiń kiltin, bapkerine 5 mıllıo­n teńgeniń sertıfıkatyn tapsyrdy. Batyr ulǵa kórsetilgen qoshemet munymen bitken joq. Olımpıada júldegerin quttyqtap, nıetterin bildirý úshin halyq ortalyq alańǵa jınaldy. Tolaǵaı bastaǵan top sonda bardy. Zor jetistikke jetken ulandy halyq alaqanyna salyp qarsy aldy. Oblys ákiminiń orynbasary Rýslan Rústemov bastaǵan azamattar sportshyny taǵy da jeńi­simen quttyqtap, qola júldeniń Tokıo Olımpıadasynda altynǵa aınalatynyna senim bildirdi. Erjan BAITILES, «Egemen Qazaqstan» QYZYLORDA