Danııar Eleýsinov – jaratylysyn Qudaı molynan bere salǵan jigit. Rıo Olımpıadasynan keıin Qazaq baspasóz ortalyǵynda chempıondar men júldegerlerdiń jýrnalıstermen kezdesýi ótip, jarystan soń attyń jaly, túıeniń qomynda júrip aıtylmaı qalǵan áńgimelerge osynda kezek berildi. Sharshy alańda qarsylastaryna ese bermeı, barlyǵyn kúmánsiz jeńgen Danııar – otbasynyń kenjesi. Úılengen, aırandaı uıyp otyrǵan otbasy bar.
Jýrnalıster aınalyp kelip, sport týraly suraı beremiz. Biraq bokstan da bólek ómir bar. Danııardan osy jaǵyn bilgimiz kelgen. Ákesi Marat – óziniń jeke bapkeri, balasy úshin janyn berýge beıil. Danııar jartylaı fınalda qabaǵyn jaryp alǵanda, ákesi janyn qoıarǵa jer taba almaı qabaryp ketti. Syńaıynan ulynyń ornyna ózi sharshy alańǵa qarǵyp shyǵyp, aıqas salýǵa barlyǵy ańǵarylady. Búginde kóp balalar bolyp tolyp alǵan soń ózin aıalap ósirgen ata-anasyn umytyp ketedi, ıakı bolmasa «joly osy eken» dep, kútýshi jaldap, qart baqqannyń qıyndyǵynan qashyp, ózderi bólek turady. Ata-anasynyń qarny toıǵanyn emes, bala-shaǵasynan ózderine degen qurmet pen meıirim izdeıtinin umytady. Kóptegen jurtta burynnan bar osy minez qazaq jastarynyń boıynan da tabyla bastaǵany búginderi úlken problemaǵa aınalyp keledi. Ult zııalylary da osy máselege oraı dabyl kóterip keledi.
– Aǵa, maǵan ómir syılaǵan áýeli Alla taǵalaǵa jáne ata-anama qurmetim sheksiz, – deıdi jeńimpaz. – Jas kezimizde aıalap ósirdi. Balamyz ǵoı, keıbir balalardyń jaqsy kıingenin, jaqsy zattar ustap júrgenin kórip, maǵan da kerek desem, ákem mindetti túrde alyp beretin. О́zi jattyqtyrýshy bolyp jumys jasaıdy, artyq aqshasy joq bolýy da múmkin ǵoı. Biraq balamnyń kóńili basylyp qalmasyn, ózgelerden kem bolmasyn dep oılaıtynyn eseıgen soń baıqap kelemiz. Bizdiń otbasymyzda olardan artyq asqar taý joq. Men úıdiń kenjesimin. О́zge baýyrlarym ata-anammen birge turǵysy kelýi múmkin, biraq qara shańyraq ıesi menmin. Sondyqtan ómiriniń aqyryna deıin meniń qolymda bolady. Jubaıymyz ekeýmiz betterine jel bolyp tımeımiz. Áke-sheshem kóńili neni qalasa, sony alyp beremin. О́ıtkeni, olar urpaǵynyń aldynda ata-analyq boryshyn adal oryndady. Bizderdiń sanaly , bilimdi bolyp ósýimizge kerek barlyq jaǵdaıdy jasady. Endi olardyń barlyq jaǵdaıyn jasaý – bizdiń perzenttik mindetimiz».
«Aınalaıyn-aı» dedik ishteı súısinip. Búkil alash «altyn balamyz» dep saǵan arqasyn súıep, marqaıyp otyr. Bokstyń urdajyq tóbeles emes, uly óner ekendigin dáleldegen darabozdy dúnıejúzindegi barlyq boks mamandary tańdaıyn qaǵyp maqtap otyr. Osyndaı alqalaǵan aǵaıynǵa sen ózińniń aqyl parasatyńmen taǵy da bıiktep kettiń. Otan degen uly uǵym eń aldymen otbasy qundylyǵynan bastalady.
Biz buryn myqty boksshy Danııar Eleýsinovti ǵana biletin edik. Jan saraıyna úńile bermeıdi ekenbiz. Jer sharynyń bir qıyrynda júrip, ata-anasynyń jáne ultynyń sadaǵasy bolǵan baýyrym-aı, búgingi jastar úlgi alǵysy kelse keýdesin bastyrmas Alataýdaı qasqaıyp sen tur ekensiń. Ulttyń batyry senen úlgi alsa, alash balasy jahandanýdyń ózinen basqany umytatyn jylymyna túse qoımas.
Baqtııar T AIJAN,
«Egemen Qazaqstan»