Elbasy N.Nazarbaevtyń bastamasymen, ótkenimizdi túgendep, barymyzdy jańǵyrtý maqsatynda qolǵa alynǵan ulttyq-strategııalyq «Mádenı mura» baǵdarlamasy aıasynda 2004-2006 jyldardan beri Jambyl oblysy aýmaǵynda ornalasqan, Ortalyq Azııada teńdesi joq Aqyrtas saraı qalashyǵynda arheologııalyq qazba-zertteý jumystary jalǵasyp jatyr. Ulttyq baǵdarlamanyń 2009-2011 jyldarǵy ekinshi kezeńinde qazba, zertteý, jańǵyrtý jumystary odan ári jandanyp, tarıhı keshen basynda «Aqparattyq-ǵylymı ortalyq» ashyldy.
– Qalashyqta jumystyń negizgi bóliginde ejelgi qalashyq aýmaǵyn aralaıtyn ishki arbat jıekteri qaıta jóndelip, retke keltirilýde. Tarıhı muranyń negizgi bóliginde turǵan tuǵyr baǵanalar jańǵyrtylyp, keshenge kelip ketýshi qonaqtarǵa arnalǵan turmystyq arnaıy nysandarǵa aparatyn jıek jol qurylysy salynýda. Atalǵan jumystardy «Qazqaıtajańǵyrtý» RMK Taraz fılıalynyń mamandary atqarýda, – deıdi, «Ejelgi Taraz eskertkishteri» qoryq-mýzeıiniń dırektory T.Moldaqynov.
Keshende atqarylyp jatqan qaıta jańǵyrtý, abattandyrý jumystarynyń barlyǵy derlik keler jyly elimizde ótetin EKSPO-2017 halyqaralyq kórmesine ázirlik jumystary aıasynda qolǵa alynǵan. Eske sala keteıik, Aqyrtas saraı kesheni kórmege kelýshi qonaqtarǵa arnalǵan arnaıy týrıstik baǵyt tizbesine engen.
Almas MUHTAROV